Нийслэлтэй гэрээтэй ариутгал халдваргүйтгэлийн мэргэжлийн 37 байгууллага нийгмийн хариуцлагынхаа хүрээнд автобусны буудлуудыг зориулалтын тоног төхөөрөмж, угаалгын бодисоор үнэ төлбөргүй угааж, цэвэрлэхээр болжээ.  Өчигдрөөс /2020.04.26/ автобусны буудлуудыг тусгай цэвэрлэгээний бодис, шүршигч төхөөрөмжөөр угаах ажил үргэлжилж байна гэж Нийслэлийн Засаг даргын орлогч Б.Отгонсүхийн ажлын албанаас  мэдээллээ.

Ташрамд дурдахад, шинэ коронавирусийн халдвар тархахаас урьдчилан сэргийлэх, урин дулааны улирал эхэлж байгаатай холбогдуулан орчны халдвар хамгаалал, эрүүл ахуйн нөхцөлийг сайжруулах, болзошгүй эрсдэлээс урьдчилан сэргийлэх зорилгоор автобусуудад өглөөний эх авалт, оройн буултаар цэвэрлэгээ, ариутгал, халдваргүйтгэлийг тогтмол хийж байна.

Халдвар хамгааллаа сахиж, нийтийн тээврээр зорчихдоо амны хаалтаа тогтмол зүүж үйлчлүүлээрэй.