Сүүлийн үед иргэд, олон нийтийн дунд "КОВИД-19" халдварын болзошгүй аюулаас сэргийлэх хандлага, сэрэмж суларч байгаатай холбогдуулан халдварын тархалтаас урьдчилан сэргийлэх ажлыг чангатгах зорилгоор “Маскаа зүүцгээе” аяныг улс орон даяар дөрөвдүгээр сарын 12-ноос ирэх сарын 31-ний өдрийг дуустал зохион байгуулж эхэллээ.

Уг ажлыг хүрээнд "Улсын онцгой комиссоос гаргасан шийдвэрийн дагуу амны хаалтаа зүүж хэвшүүлэх тал дээр хотын доторх автобусанд шугамын шалгалт хийж, зөрчлийг арилгуулан ажиллаж байна. Эрсдэлтэй цаг үед эрхэм зорчигч та орон нутагт зорчихдоо амны хаалтаа тогтмол зүүж, гараа ариутгаж зорчихыг анхааруулъя." гэдгийг Нийслэлийн засаг даргын орлогч Б.Отгонсүх ажлын албанаас мэдээллээ.

Амны хаалт хэрэглэхэд анхаарах зүйлс:

• Зөв зүүх,
• Зөв тайлах,
• 2 цаг тутамд болон бохирдсон тухай бүр солих,
• Зүүсэн амны хаалтны гадна хэсэгт аль болох гар хүрэхгүй байх,
• Нэг удаагийн амны хаалтыг бохирдсон тохиолдолд шууд хаях,
• Амны хаалт сольсны дараа гараа заавал савандаж угаах эсвэл спиртэн суурьтай гар халдваргүйжүүлэгч хэрэглэх,
• Даавуун амны хаалтыг солих бүртээ 40-өөс дээш хэмийн халуун усанд савандаж угааж, индүүдэх,
• Өдөрт дунджаар 4-5 ширхэг амны хаалт сольж хэрэглэх,
• Амны хаалт чийгтэй болсон даруйд шинээр солих,
• Цэвэр болон бохирдсон амны хаалтыг хольж болохгүй