Нийслэлийн Газар зохион байгуулалтын албанаас цэцэрлэгт хүрээлэнгийн зориулалттай 32 шинэ газрыг албан ёсоор албажуулсан байна. 

Энэ талаар Нийслэлийн газар зохион байгуулалтын албаны Газрын менежмент төлөвлөлтийн хэлтсийн ахлах мэргэжилтэн Л.Отгонбаатар "Өнгөрсөн долоо хоногт болсон НИТХ-ын тэргүүлэгчдийн хурлаар 32 байршлыг тогтоон “Нийтийн эдэлбэр газар”-аар бүртгэн баталгаажуулсан. 

Өмнө нь НИТХ-ын Тэргүүлэгчдийн 2009 оны есдүгээр сарын 23-ны өдрийн 114 дүгээр тогтоолоор 54 байршлын 25,104.64 га газар, 2010 оны арвандүгээр сарын 17-ны өдрийн 180 дугаар тогтоолоор 32 байршлын 34.8 га газар, нийт 86 байршилд эзэмшил, ашиглалтад олгохгүй болон барилга, байгууламж барихыг хориглосон удаатай. Гэвч бодит байдал дээр зарим байршилд нийслэл, дүүргийн Засаг даргын захирамжаар газар эзэмших, ашиглах эрх олгогдсон, бүтээн байгуулалтын ажлууд хийгдсэн байна.  Судлаад үзэхэд тухайн үед тогтоогдсон 86 байршлынхаа эргэлтийн цэгийг нарийн тогтоож газрын мэдээллийн санд бүртгээгүй. Мөн тухайн байршлуудаа байгууллагуудад хариуцуулж өгөөгүй хяналт сул байснаас болсон байна.

Тиймээс энэ сарын 2-ны өдрийн Нийслэлийн Иргэдийн Төлөөлөгчдийн хурлын Тэргүүлэгчдийн хурлаар Улаанбаатар хотын нийтийн эзэмшлийн амралт, зугаалга, биеийн тамирын зориулалттай газар, цэцэрлэгт хүрээлэн, ногоон байгууламжийг нэмэгдүүлэх, нийтээр зүй зохистой ашиглах, хамгаалах зорилгын хүрээнд иргэдийн аюулгүй, амар тайван амарч, зугаалж чадахуйц, улс төр, нийгмийн нэрт зүтгэлтнүүдийн хөшөө дурсгал, урлагийн бүтээл бүхий байгууламжтай ногоон байгууламж, цэцэрлэгт хүрээлэнгийн 32 байршлыг  “Нийтийн эдэлбэр газар”-т хамааруулан тогтоож, нийтээр ашиглах, цаашид бусдын эзэмшил, ашиглалтад олгохгүй байх, барилга байгууламж барихыг хориглож шийдвэрлэсэн" гэв.

Цаашид дээрх 32 газарт барилга бариулахгүй, арчлалт хамгаалалт, тохижилтын ажлыг дүүргийн засаг дарга нартай гэрээ байгуулан жил бүр дүгнэн ажиллах юм байна.

Жишээлбэл,

• УДЭТ-ын урд талын газар эзэмших эрх
•  Чингисийн өргөн чөлөө, Торгоны зам хөшөөтэй уулзварын баруун тал, орон сууцны 16 дугаар байрны урд тал,
• МУИС-ийн хичээллийн 2-р байрны урд тал,
• Централ таурын урд талбай,
• Сүхбаатарын талбайн урд талын цэцэрлэгт хүрээлэнгийн талбай зэрэг нийт 32 газрыг аж ахуйн нэгжид олгосон байсныг хүчингүй болгон НИЙТИЙН ЭДЭЛБЭР  газарт хамруулсан байна.