Хотын төвийн насжилт өндөртэй 1950, 1960 онд баригдсан барилгуудыг яах вэ гэдэг асуудал сүүлийн үед Нийслэлийн удирдлагуудын  толгойны өвчин болж байгаа.

Эдгээр барилгыг буулган, дахин барилга барихын тулд ихээхэн хэмжээний хөрөнгө шаардана. Хөрөнгө гаргах компаниуд олддог юмаа гэхэд оршин суугчдын асуудлыг яах вэ. Оршин суугчид барилгын компаниудтай тохироод, байраа үнэлээд өөрсдийн аюулгүй байдал, амьдрах орчноо сайжруулах тохиролцоог хийж чадах уу гэх мэт олон зүйл энэ асуудлын ард яригдах юм.

Нийслэлийн ИТХ 2015 онд энэ асуудлыг анхлан хөндөж байв. Тиймээс Бага тойруугийн хуучин барилгыг буулгах, оновчтой төлөвлөлтийн ТЭЗҮ-ийг батлах тухай 28/13 тоот тогтоолыг гаргаж байжээ.

Улаанбаатар хотын 2020 он хүртэл хөгжүүлэх ерөнхий төлөвлөгөөний тодотгол, 2030 оны хүртэл хөгжлийн чиг хандлагад нийцүүлэх бодлогын хүрээнд Чингэлтэй, Сүхбаатар дүүргийн нутаг дэвсгэрт байх хуучин барилгуудыг цэгцлэх, шинэчлэх тухай энэ тогтоолд тухайн үеийн Нийслэлийн ИТХ-ын дарга Д.Баттулга гарын үсэг зурсан байдаг юм.

Үүнээс өмнө 2014 оны наймдугаар сарын 25-нд Онцгой байдлын ерөнхий газраас Улаанбаатар хотын Ерөнхий менежер, Захирагчийн Ажлын албаны дарга Б.Бадралд нэгэн бичиг ирсэн бөгөөд үүнд

Нийслэлийн нутаг дэвсгэрт байршилтай насжилт өндөртэй 1950, 1960 онд баригдсан орон сууцны барилгын чанар, аюулгүй байдалд үзлэг шалгалт явуулсан тухай 13 хуудас тайланг хүргүүлсэн аж. Тайлангийн зөвхөн нэг хэсгийг ишлэн хүргэе. Жич: Бусдыг цаасан баримтаас үзэх боломжтой.

Сүхбаатар дүүргийн 4 дүгээр хорооны нутаг дахь, Нэгдүгээр 40 мянгатын орон сууцны 45, 46, 47, 48, 49, 50, 51, 52, 53 байрууд 1962 онд баригдсан.

Гурван давхар, 1-4 орцтой тус байруудад 140 гарй айл өрх бий. Барилгын хийц бүтэж нь тоосго ханатай, давхар дундын хучилт нь бетон, барилгын дам нуруу нь мод, төмөр дээвэртэй, тулгуур нь модон хийцтэй.  

Нэг: Цахилгааны ерөнхий самбарын өрөөнд эд зүйл хураасан, газардуулга хийгдээгүй байгаа нь Цахилгаан байгууламжин дүрэм БД 43-101-03 дүрмийг зөрчсэн.

Хоёр: Орон сууцны барилгын дээврийн хөндийн цахилгаан шугам сүлжээний монтаж, ашиглалтын шаардлага хангахгүй, орон сууцны барилгын цахилгааны төв шугамны монтажны утсыг барилгын дээврийн хөндийд модон хийц бүтээц дээгүүр дамнуулан ил татаж явуулсан, хамгаалалтын бэхэлгээ хийгээгүй нь Цахилгааны байгууламжийн дүрэм БД-43-101-03 дүрмийг зөрчсөн.

Гурав: Барилгын орцноос дээвэр лүү гарах нээлхий (люк) 2 ширхэг хийгдсэн боловч дээвэр лүү гарах шатгүй, барилгын гадна аваарын шат төлөвлөгдөж хийгдээгүй.

Дөрөв: Барилгын модон хийц бүтээцэд болон бусад шатамхай материалд мэргэжлийн байгууллагаар гал тэсвэршилтийн нэвчилгээ хийгдээгүй.

Тав: Орон сууцны барилга, байгууламжийн гадна нэгдсэн усан хангамжийн системд гал унтраах автомашиныг утсаар тасралтгүй хангах, усны эх үүсвэр буюу галын гидрант төлөвлөгдөөгүй нь Усан хангамж, гадны сүлжээ ба байгууламж БНбД 40-02-06 норм дүрмийг зөрчсөн.

Зургаа: Барилгын авралтын гарц, нөөц гарц хангалтгүй, дээврийн хөндийн нээлхийг цоожилсон. Дээврийн хөндий рүү орох нээлхийд шат төлөвлөгдөөгүй нь Барилга байгууламжийн галын аюулгүй байдал БНбЛ 21-01-02 норм дүрмийн 6.2, 6.3, 6.10 дахь заалтыг зөрчсөн.

Долоо: Орон сууцны барилгын өргөтгөлд үйл ажиллагаа явуулж байгаа ААН, байгууллагууд нь барилгын хийц бүтээцийг өөрчлөх, өргөтгөл хийх, цахилгааны шугам сүлжээг өөрчлөхдөө Онцгой байдлын байгууллагаар барилгын ажлын зургийг хянуулж, зөвшилцөөгүй.

Найм: Өргөтгөлд үйл ажиллагаа явуулж буй ААН-ийн цайны газрууд нь мэргэжлийн байгууллагаас шингэрүүлсэн хийн тоног төхөөрөмж ашиглах зөвшөөрөл аваагүй, ажлын зураг гаргаж хянуулаагүй нь Хийн хангамжийн дүрэм БНбД 42-02-04 норм дүрмийг зөрчсөн.

Ес: Галын аюулаас урьдчилан сэргийлэх болон гал унтраах дүрэм, хэм хэмжээ, стандартыг хангаж ажиллаагүй нь Галын аюулгүй байдлын тухай хуулийн 16 дугаар зүйлийн 16.1.3 дахь заалтыг зөрчсөн.

Арав: Дээрх орон сууцны барилгууд руу тусгай зориулалтын гал унтраах автомашин орох замын гарц хангалтгүй.

Арваннэг: Барилга байгууламжийн хийц, бүтээцийн шийдэл нь гал түймэр гарсан тохиолдолд хүн асын аюулгүй байдлыг хангахуйц, гал түймрийг бага хохиролтойгоор унтраах бололцоог хангаагүй нь Галын аюулгүй байдлын тухай хуулийн 18 дугаар зүйлийн 18.1 дэх заалтыг зөрчсөн.

Онцгой байдлын ерөнхий газар ийм дүгнэлтийг хүргүүлсний дараа НИТХ-ын дарга Д.Баттулга өөрийн гараар үзэглэсэн тогтоолыг гаргасан аж.

Энд хотын ерөнхий төлөвлөгөөний дагуу арктай орон сууц худалдаа, үйлчилгээний барилга барих ёстой ч оршин суугчид нь 15 жил эсэргүүцэж ирсэн юм. Тэд эсэргүүцэх шалтгаанаа орон сууцны байрны цонх баригдах гэж байгаа барилгын ханатай зэрэгцэх учраас боломжгүй хэмээн тайлбарлаж ирсэн байдаг.

Ерөнхий архитекторын баталсан төлөвлөгөөний дагуу оршин суугчдын гарц, орцыг хаалгүй барих ёстой арктай 4 барилгын 2 нь аль хэдийнэ ашиглалтад орсон. Одоо үлдсэн хоёр барилгыг барих асуудал оршин суугчдын амбицаас болж саатчихаад байгаа нь энэ. Энэ бол ОБЕГ-ын албан ёсны дүгнэлт юм.

Өнгөрсөн долоо хоногт 2016 оны сонгуульд ялагдал хүлээж, НИТХ-ын даргаас буун төлөөлөгч дээр тогтсон Д.Баттулга өөрийн сонгогдсон тойрог болох Нийслэлийн Нэгдүгээр 40 мянгатын иргэдтэй уулзсан байна.

Энэ үеэр иргэд Д.Баттулгаас хотын төвийн хуучин барилгыг буулгах, оновчтой төлөвлөлт хийж ажлын хамааралд багтсан байрууд, энэ барилга барих зөвшөөрөл авчихсан байгаа компаниудын барилгыг яах вэ гэж асуужээ.

Харин Д.Баттулга энэ асуултад хариулахдаа өөрийн үзэглэсэн Бага тойруугийн хуучин барилгыг буулгах, оновчтой төлөвлөлтийн ТЭЗҮ-ийг батлах тухай 28/13 тоот тогтоол, Нийслэлийн ерөнхий төлөвлөгөөг үгүйсгэн барилга барих зөвшөөрлүүдийг хүчингүй болгосон гэсэн үгээр иргэдэд худлаа мэдээлэл түгээжээ.

Сонгуулийн цикль хаяанд ирж, улс төрчид тойргоо эрчимтэй эргэж эхэллээ. Гэхдээ тэд тойргоо зүгээр нэг эргэчихгүй, иргэд сонгогчдын тархийг худлаа мэдээллээр угаах явдлаа ч зогсоохгүй бололтой.

Бага тойруугийн хуучин барилгыг буулгах, оновчтой төлөвлөлтийн ТЭЗҮ-ийг батлах тухай Д.Баттулгын үзэглэсэн 2015 оны 28/13 тоот тогтоол

Нийслэлийн нутаг дэвсгэрт байршилтай насжилт өндөртэй 1950, 1960 онд баригдсан орон сууцны барилгын чанар, аюулгүй байдалд үзлэг шалгалт явуулсан Онцгой байдлын ерөнхий газрын дүгнэлт

С.НОМИН