Байгалийн баялгийн өгөөжийг хүртэж чадахгүй, орлогоос нь орон нутагт хөрөнгө оруулалт хийгдэхгүй байгаа талаар Дархан-Уул аймгийн иргэдийн төлөөлөл болсон таван төрийн бус байгууллага өнөөдөр мэдээлэл хийлээ.

 Дархан-Уул аймгийн “Бизнес эрхлэгчдийн холбоо” ТББ-ын тэргүүн Г.Гантулга:

Одоогийн  “Кью Эс Си” компани төмөрлөгийн үйлдвэрийг аваад таван жил ажиллалаа. Жилд 2 сая тонн буюу 90 гаруй сая ам.долларын хүдэр урд хөрш рүү гаргаж байна. Таван жилд дунджаар 450 сая ам.долларын орлого олсон хэдий ч металлургийн цогцолбор барих ажил яагаад явагдахгүй байна вэ? Үйлдвэрүүдэд хөрөнгө оруулалт огт хийгдэхгүй байна. Ямар ч хараа хяналтгүй ажиллаж байна. Тиймээс нээлттэй компани болгохыг бид шаардаж байна.

“Кью Эс Си” компанид захидал хүргүүлсэн бөгөөд дөрвөн шаардлагыг тавьсан талаар “Дархандаа сайхан амьдарцгаая” ТББ-ын тэргүүн Б.Мягмардаш мэдэгдэв. Үүнд:

1. “Кью Эс Си” компани металлургийн цогцолбор барих ажилаа хэрхэн гүйцэтгэж байгаагаа танилцуулах
2. Үйлдвэр байгуулна гэсэн баталгаа гаргаж өгөх
3. “Дархан төмөрлөгийн үйлдвэр”-ийг олон нийтэд нээлттэй компани болгох
4. Үйлдвэрийг хувьцааг Дарханы 100,000 иргэнд эзэмшүүлэх гэв.