“ЖДҮ хулгайчдын эсрэг сошиал жагсаал” зохион байгуулагч залуус өнөөдөр мэдээлэл хийлээ.

Сошиал жагсаалын зохион байгуулагчдын гишүүн н.Шинэгэрэл:

“Сүүлийн 20, 30 жилд Монголын төрд ил, далд хулгай дийлэхээ больсон. Сүүлдээ ил цагаандаа гарч, хууль зөрчин, нотлох баримттайгаар хулгай хийдгийг бид мэдэж байна. Энэ олон хулгай дотроос хамгийн ил тод, нотлох баримттай, эзэнтэй нь ЖДҮ-гийн хэрэг. Төрд олон жил бугшсан хэсэг бүлэг хүний хулгайтай монголчууд тэмцэж, хуулийн өмнө хариуцлага хүлээлгэх ёстой.

ЖДҮХС-аас хулгай хийсэн төрийн өндөр албан тушаалтнууд ялангуяа УИХ-ын гишүүд Эрүүгийн хуулийн 22.1 дэх заалтаар 8 хүртэлх жилийн хорих ял эдлэх ёстой. Тиймээс бид энэ хүмүүсийг ёсзүйн, хуулийн хариуцлага хүлээтэл тэмцэнэ” гэлээ.

Тэд хууль зөрчсөн үйлдлийг эсэргүүцэж буй ТББ, хөдөлгөөнтэй нэгдэж тэмцэхээ илэрхийллээ.  Мөн ЖДҮ-ийн хулгайчдыг хуулийн өмнө хариуцлага хүлээлгэж чадвал Шударга бусын хонгилд байгаа 60 тэрбумчдыг, концессчдыг, лиценз эзэмшигчдийн луйварыг илрүүлэх боломжийн үүд хаалгыг нээж чадна хэмээн үзэж буй аж.