Монгол Улсын Ерөнхий сайд, МАН-ын дарга У.Хүрэлсүх Хотын дарга С.Батболдыг огцруулах хүсэлтийг намынхаа Удирдах зөвлөлд оруулсан. Удирдах зөвлөл хуралдаж, санал хурааснаар олонхын саналаар Хотын даргыг огцруулах шийдвэр гаргасан. Удирдах зөвлөлийн энэхүү шийдвэрийг НИТХ хэлэлцэж, эцсийн шийдвэр гаргах ёстой бөгөөд өнөөдөр хуралдаж, түүнийг огцруулах эсэх асуудлыг хэлэлцэх юм. НИТХ-ын төлөөлөгчдийн хуралдаан өнөөдөр 08.30 цагт эхлэх байсан ч ирц хүрээгүй тул эхлээгүй байсан юм. Тэгвэл 16:25 минутанд НИТХ-ын хурал 45-аас 43 хүний ирцтэйгээр эхэлсэн юм.  

НИТХ-ын төлөөлөгч Э.Бат-Үүл: 

"Ерөнхий сайдаас нийслэлийн Засаг даргыг огцруулах тодорхой хуулийн үндэслэл бүхий саналыг НИТХ-д анх удаа ирж байна. Ийм улс төрийн үйл ажиллагаа байж болох уу. Энэ бол маш ноцтой зүйл. Хуулийн дагуу явах ёстой. Нутгийн өөрөө удирдах ёсны байгууллагын хэм хэмжээг доголдуулсан үйл явдал болох гэж байна. Ерөнхий сайд Нийслэлчүүдийн өөрөө удирдах байгууллагыг ингэж доор үзэж болохгүй. Хүн амын 50 хувь, эдийн засгийн 60-70 хувийг бүрдүүлдэг Монгол улсын гал голомт болсон нийслэлийн асуудлыг ярьж байна. Тийм учраас Ерөнхий сайд өөрөө заавал байх ёстой. Ерөнхий сайд өнөөдөр хэвлэлийн бага хурал хийх үеэрээ яагаад хотын даргыг огцруулах гэж байгаа үндэслэлээ танилцуулах ёстой байсан. НИТХ-ын хурал дээр Засгийн газрын хэрэг эрхлэх газрын дэд дарга нь ирснийг ойлгохгүй байна. " хэмээлээ. 

НИТХ  дахь АН-ын бүлэг Нийслэлийн Засаг дарга С.Батболдыг огцруулах асуудалд завсарлага авлаа. Учир нь Хотын даргыг огцруулах санал оруулж ирсэн Ерөнхий сайдыг НИТХ-ын хуралд ирж асуудлаа танилцуулах ёстой гэж үзжээ. Тиймээс хурлыг 17:30 цаг хүртэл завсарлуулав.