Нийслэлийн Засаг даргын зөвлөлийн хурал өнөөдөр боллоо.  Энэхүү хурлаар хичээлийн шинэ жил, боловсролын салбарын бүтээн байгуулалт, зам засвар, арчлалт гэх мэт цаг үеийн асуудлыг хэлэлцсэн бөгөөд энэ үеэр НАЗХГ-ын дарга Ж.Тогтохбаяраас дараах тодруулгыг авлаа. 

Нийслэлийн авто замын хөгжлийн газрын дарга Ж.Тогтохбаяр

2018 оны 7 дугаар сарын 16-аас 21-ний өдрүүдэд орсон хүчтэй аадар борооны улмаас Улаанбаатар хотын гол болон туслах замуудад томоохон эвдрэл гэмтлүүд гарсан. Ойролцоогоор 12 мянган метр квадрат нүхэн эвдрэл гарсан гэсэн судалгаа байна. Үүнийг 14 аж ахуйн нэгж компани зургаан багт хуваагдан засварлаж байгаа бөгөөд үүнд “Улаанбаатар Зам Засвар Арчлалтын Газар” ОНӨААТҮГ  дөрвөн  бригад ажиллаж байна. Үер устай холбоотой гудамж, замууд дээр цугласан их ус, шалбаагыг Геодези, усны барилга байгууламжийн газраас есөн бригад 24 цагийн шуурхай бүлгүүд газар дээр нь соруулах арга хэмжээ аван ажиллаж байна.

Энэ жилийн хувьд Улаанбаатар хотын хэмжээнд зам арчлалтын ажлууд 90 хувьтай, явган хүний гарц, сургууль орчмын тохижилтын ажлууд хийгдээд 80 хувьтай явж байна. Энэ сарын 25-н гэхэд авто замын бүтээн байгуулалтын ажил бүрэн дуусахаар төлөвлөгөөтэй ажиллаж байна.