Жил бүр барилгын ажлын оргил үе эхлэхээс өмнө буюу гуравдугаар сард зохион байгуулагддаг "Улаанбаатар барилга 2018" материал, шинэ технологи, орон сууц, хот тохижилтын үзэсгэлэн Мишээл экспо төвд өнөөдөр нээгдлээ.

Үзэсгэлэн 2018 оны 3 дугаар сарын 15-наас 19-нийг дуустал Барилгын материал ба шинэ техник технологи, 3 дугаар сарын 22-ноос 26-ныг дуустал Орон сууц ба хот тохижилт гэсэн хоёр чиглэлээр тус бүр таван өдрийн хугацаатайгаар зохион байгуулагдаж байна.

Энэ нь Монгол Улсад барилгын материал үйлдвэрлэгч, ханган нийлүүлэгч, барилгын багаж хэрэгсэл, тоног төхөөрөмжийн импорт, худалдаа эрхлэгч гээд 100 гаруй аж ахуйн нэгж байгууллагын бүтээгдэхүүн үйлчилгээг сурталчлах, салбар хоорондын хамтын ажиллагааг өргөжүүлэх, түүнчлэн сүүлийн үеийн шинэ дэвшилтэт техник технологийн талаар олон нийтэд мэдээлэл хүргэх үндсэн зорилготой юм байна.

    Түүнчлэн Монгол Улсад барилга угсралт, орон сууцны худалдаа эрхлэгч аж ахуйн нэгж байгууллагуудын бүтээн байгуулалт, үйл ажиллагааг дэмжих, энэхүү салбарт ажиллах хүчний зуучлал, барилга орон сууцны захиалга, барилгын гадна тохижилт, ногоон байгууламж, гэрэлтүүлэг, шинэ дэвшилтэт техник технологийн талаар хэрэглэгчдэд сурталчлан таниулах зэрэг өргөн боломжийг оролцогч байгууллагуудад олгохыг зорьж байгаа аж.

Үзэсгэлэнд хүрэлцэн ирснээр та бүхэн дээрх мэдээллээс гадна барилгын салбарт тэргүүлэх хэвлэл мэдээллийн хэрэгсэл болсон "Барилга.МН" сар тутмын сэтгүүл, салбарын аж ахуйн нэгжүүдийн мэдээллийг нэгтгэсэн www.barilga.mn вэб сайт, барилгын материалын онлайн худалдааг амжилттай эхлүүлээд буй "Барилгачин Групп"-ийн үйл ажиллагаатай танилцаж, бүтээгдэхүүн үйлчилгээнээс нь гадна хүссэн мэдээллээ авах боломжтой юм.