НИТХ-ын дарга С.Амарсайхан болон зарим төлөөлөгчид Сонгинохайрхан дүүргийн цагдаагийн гуравдугаар хэлтсийн шинэ байрны нээлтийн үйл ажиллагаанд оролцлоо. Тэрээр цагдаагийн албан хаагчид, бие бүрэлдэхүүнийг ажил үүргээ гүйцэтгэхэд нь хамгийн чухал асуудлын нэг бол ая тухтай ажлын байраар хангах, шаардлагатай техник хэрэгсэл, машин техникээр хангах асуудал юм. Энэ хэмжээгээр нийслэлийн оршин суугчдын эрүүл, аюулгүй орчинд оршин суух, амар тайван байдлыг хамгаалах асуудал тодорхой хэмжээгээр шийдэгдэж байгаа гэж үзэж байна гэлээ.Өнгөрсөн оны  зургадугаар сард эхэлсэн барилгын ажил өнөөдөр бүрэн ашиглалтанд орж байна.

СХД-ийн 3-р хэлтсийн хамт олон өмнө нь зориулалтын бус конторт буюу 28 хүний багтаамжтай байранд 142 албан хаагч ажилладаг байжээ. Тус хэлтэс нь дүүргийн арван хорооны нутаг дэвсгэрт 17 мянган өрхийн 70 орчим мянган иргэдийн ая тухтай аюулгүй байдлыг сахин хамгаалдаг.

Дүүргийн хэмжээнд томоохон худалдааны төвүүд олон учраас халаасны хулгайн гэмт хэрэг зонхилдог. Нэг өрөөнд 5-6 байцаагч сууж мэдүүлэг авдаг байсан бол одоо байцаагч бүр тусдаа өрөөтэй боллоо. Шинээр ашиглалтад орсон энэ байр хүүхэд болон хүчирхийлэлд өртсөн иргэдээс мэдүүлэг авах тусгай өрөөтэй. Энэ нь иргэдийн аюулгүй байдал болон хэргийн нууцлал алдагдахгүй байхад чухал нөлөөтэй ажээ.