Нийслэлийн Засаг даргын Тамгын газар, нийслэлийн Соёл урлагийн газар, Монголын урлагийн зөвлөл, Монголын кино урлагийн зөвлөл хамтран зохион байгуулдаг “Улаанбаатар” олон улсын IX кино наадмын нээлт өнөөдөр Corporate Hotel & convention center-т боллоо. Нээлтийн арга хэмжээнд нийслэлийн удирдлагууд оролцож шагнал гардууллаа.

“Улаанбаатар” олон улсын IX кино наадам өнөөдрөөс эхэлж байгаа бөгөөл аравдугаар сарын 15-ныг хүртэл үргэлжилнэ.

Энэ удаагийн наадмын хүрээнд нийслэлийн Соёл урлагийн газраас санаачлан Монгол киноны уралдааныг нээлттэй зарлаж, “Уран сайхны кино”, “Баримтат кино”, “Хүүхдийн кино бүтээл”, “Нээлтийн кино” гэсэн дөрвөн төрөлд тус бүр нэг кино бүтээлийг шалгаруулж өнөөдөр зохион байгуулагдах наадмын нээлт, шагнал гардуулах ёслолын үеэр цом, өргөмжлөл, мөнгөн шагналаар шагнах юм.

“Улаанбаатар” олон улсын IX кино наадмын “Нээлтийн кино”-оор найруулагч Д.Золбаярын бүтээл “Чингисийн хүүхдүүд” уран сайхны кино шалгарч, албан ёсны нээлтээ Corporate Hotel & convention center-т хийхэд бэлэн болоод байна. Бусад төрөлд шалгарсан кино бүтээлүүд энэ сарын 13-нд Монгол кино хөтөлбөрийн үеэр Тэнгис кино театрт олны хүртээл болно.

Энэ жилийн наадмын онцлох орноор Америкийн Нэгдсэн Улс сонгогдсон ба “Америкийн Кино Өдөрлөг”-ийг маргааш Америкийн Элчин сайдын яамтай хамтран зохион байгуулна. Америкийн Кино Өдөрлөгийг найруулагч Нора Поггийн бүтээл “Охидын санаачлага” баримтат киногоор нээх бөгөөд тус киноны гол дүр Стэйси Феррейра Монголд айлчилж, олон нийттэй нээлттэй ярилцлага хийх болно. Наадмын үеэр нийт таван Америкийн шилдэг кино бүтээл Тэнгис болон iCinema кино театруудад гарна. Мөн өдөрлөгийн үеэр Америкийн кино найруулагч, продюсер Тони Гэрбэр Монголд айлчлан, олон улсын хамтарсан кино уран бүтээл туурвих туршлагаасаа хуваалцаж, Монголын уран бүтээлчдэд зориулан хоёр өдрийн сургалт явуулна.