"Буянт-Ухаа-2" хорооллоос борлогдоогүй үлдсэн 3 өрөө орон сууцнуудыг гэр хорооллын хашаа байшингаар солих саналыг Барилга Хот Байгуулалтын сайд Г.Мөнхбаяр нийслэлийн удирдлагуудад тавьсан. Эдийн засаг хямралтай байгаа энэ үед нэгэнт баригдаад ашиглалтанд орчихсон орон сууцыг хашаа байшингаар солих нь зорилтот бүлгийн иргэдийг орон сууцжуулах хамгийн зөв хувилбар гэж үзсэн байна.

Ирэх 7 хоногт хуралдах гэр хорооллын дахин төлөвлөлтийн төслийн удирдах хорооны өргөтгөсөн хурлаар хашаа байшинг байраар солих тухай нарийвчилсан журам гаргахаар боллоо.

Журмаар хашаа байшингийн байршил, хэмжээ, тухайн өрхөд ямар шаардлага тавих зэрэг асуудлыг тодорхой болгох гэнэ. Эхний ээлжид Нисэхийн гэр хорооллын айлуудаас оруулах тухай яригдаж байгаа юм байна. Гэхдээ зөвхөн Нисэхийн айлуудаас оруулах уу, өөр байршлуудыг хамруулах уу гэдэг нь өргөтгөсөн хурлын дараа тодорхой болох юм байна.