170 микро автобусыг хална
Насжилт нь дууссан 170 микро автобусыг ирэх наймдугаар сараас үйлчилгээнээс хасах тухай нийслэлийн Тээврийн газраас мэдээлж байна. Нийслэлийн хэмжээнд 270 микро автобус гэрээтэйгээр явдаг юм байна. Эдгээрээс насжилт нь дуусгавар болж буй микро автобусыг өнгөрөгч тавдугаар сард халах байсан ч орлох унаагүйгээс хугацааг хойшлуулсан. Ирэх наймдугаар сард микро автобусыг үйлчилгээнээс хасах шийдвэр хэвээрээ байгаа талаар нийслэлийн Тээврийн газрын дарга Ч.Энхбат хэллээ. Иргэдийн зүгээс том оврын автобус хүрдэггүй, алслагдмал гэр хороолол, мөн шөнийн цагаар хөл дүүжлэх унаагүй болно гэх асуудал ярьж байгаа. Тэгвэл микро автобусыг орлох тээврийн хэрэгслийг эхнээсээ оруулж ирсэн хэмээн мэдээллээ. Нийслэлийн Тээврийн газартай гэрээтэй ажилладаг Бага багтаамжийн үйлчилгээ эрхэлдэг тээврийн хэрэгслийн холбооныхон эхний ээлжид БНХАУ-д үйлдвэрлэсэн 10 автобусыг оруулж иржээ. Ингээд долоодугаар сарын 1-ний өдрөөс үйлчилгээнд явуулахаар төлөвлөсөн гэлээ.
Дашрамд дуулгахад, зорчигч тээврийн үйлчилгээний стандартад, үйлдвэрлэснээс хойш 12-оос дээш жил болсон тээврийн хэрэгсэл ашиглахыг хориглодог юм.