УИХ-ын 2015  оны  06  сарын  19  өдрийн хуралдаанаар Нийслэлийн хотын албан татварын тухай хуулийг хэлэлцэн баталсан бөгөөд энэхүү хуулийг өнөөдрөөс  дагаж  мөрдөж эхлэх юм.

Тус хуульд нийслэлийн нутаг дэвсгэрт үйлчилгээ  үзүүлж буй баар, ресторан, зочид буудал, амралтын газар гэсэн 4 төрлийн тусгай үйлчилгээ, бүх төрлийн согтууруулах ундаа, тамхины жижиглэн худалдаанд нийслэл хотын албан татварыг ногдуулахаар заасан.  Мөн нийслэл хотын албан татварын хувь, хэмжээг байршил, хүн амын төвлөрлийг харгалзан 0-1,0 хувийн хязгаарт багтаан Нийслэлийн Иргэдийн Төлөөлөгчдийн Хурал батална гэж заажээ.

Тиймээс НИТХ-ын ээлжит 29-дүгээр хуралдаанаар нийслэлийн хотын албан татварыг хувь хэмжээг  нэг хувь байхаар тогтоосон бөгөөд нийслэл хотын албан татвар суутгагчийг бүртгэх, бүртгэлээс хасах, мэдээлэл солилцох журмыг баталсан юм. 

Ингэснээр өнөөдрөөс эхлэн нийслэлийн нутаг дэвсгэрт үйл ажиллагаа явуулж байгаа дараах үйлчилгээ, худалдан авалтаас 1 хувийн татвар авах юм.

ДАРААХ 4 ТӨРЛИЙН ҮЙЛЧИЛГЭЭНД ТА ТАТВАР ТӨЛНӨ:

• Зочид буудал
• Амралтын газар
• Ресторан
• Баар

ДАРААХ ХУДАЛДАН АВАЛТАД ТА ТАТВӨР ТӨЛНӨ:

• Бүх төрлийн согтууруулах ундаа
• Бүх төрлийн тамхины худалдан авалт

Тодруулбал,  иргэн та 3000 төгрөгөөр тамхи худалдан авбал 30 төгрөгийг хотын албан татварт суутгуулна. Хотын албан татвараас бүрдсэн орлогыг хотын дэд бүтэц болон аялал жуулчлалыг хөгжүүлэхэд зарцуулахаар хуульчилсан байгаа билээ.

ЭХ СУРВАЛЖ:  Нийслэлийн ЗДТГ-ын Хэвлэл мэдээлэл, олон нийттэй харилцах хэлтэс