Монгол Улсын Ерөнхийлөгчийн зарлигаар эрхэлсэн салбартаа олон жил үр бүтээлтэй ажилласан иргэдийг төрийн дээд одон, медалиар шагналаа. Шагналыг нийслэлийн ИТХ-ын дарга Д.Баттулга, нийслэлийн Засаг даргын Санхүү, эдийн засгийн  асуудал хариуцсан орлогч Н.Батаа, Хот байгуулалт, хөрөнгө оруулалтын асуудал хариуцсан орлогч С.Очирбат нар гардууллаа. Өнөөдөр Монгол Улсын Ерөнхийлөгчийн зарлигаар Хөдөлмөрийн хүндэт медалиар "Мегавүүд" ХХК-ийн инженер Д.Батжаргал, "Теч" ХХК-ийн ажилтан Д.Батмөнх, Улаанбаатар хотын номын сангийн  ахмад ажилтан Ж.Дэжидмаа нарын 63 иргэн, Шударга журам медалиар Цус сэлбэлт судлалын үндэсний төвийн ажилтан, хүндэт донор Д.Бүдханд, Нийслэлийн 1 дүгээр төрөх газрын архивч, хүндэт донор Б.Доржпалам, Алтангадас одонгоор Говийн гарц ХХК-ийн нябо Ц.Амарсанаа, Зааг групп ХХК-ийн захирал А.Амартүвшин нарын 147 иргэн, Хөдөлмөрийн гавъяаны улаан тугийн одонгоор 24 иргэний энгэрийг мялаалаа. Улаанбаатар хотын нийтийн номын сангийн ахмад ажилтан, Нийслэлийн мал эмнэлгийн газрын малын эмч, Нарантуул Олон улсын худалдааны төвийн борлуулагч, Клиникийн нэгдсэн 1 дүгээр эмнэлгийн сувилагч, хүндэт донор гээд олон салбарын манлайлагч нар ийнхүү төрийн шагнал хүртлээ.