Торгуулийн хуудас  явуулаад байхад торгуулиа төлөхгүй байгаа жолооч нарыг замын хөдөлгөөнд оролцуулахгүй байхаар болжээ. Засгийн газрын 388 дугаар тоот тогтоолоор бэлэн бус торгуулийг  хэрэгжүүлэх болсон.  Уг тогтоолын 4.2-т торгууль хүлээсэн этгээд 14 хоног тутам төлөөгүй тохиолдолд давтан торгох гэсэн заалт байдаг аж.

 Замын хөдөлгөөний хууль, дүрэм зөрчсөн этгээдүүдийг 1000-10000 төгрөгийн торгууль ногдуулж байгаа билээ. Хэрэв торгуулиа төлөөгүй бол 20000 төгрөгийн торгуултай.   Өнгөрөгч нэгдүгээр сарын 1-нээс бэлэн бусаар торгууль тогтоож, мэдэгдэх хуудас тарааж эхэлсэн.Энэ хугацаанд 580 мянга гаруй зөрчилд, 5 тэрбум 800 сая төгрөгийн торгууль ногдуулсан байна. Үүнээс өнөөдрийн байдлаар торгуулын эргэн төлөлт  60 хувьтай буюу 3.4 тэрбум төгрөгийн эргэн төлөлттэй байгаа аж.

 Тиймээс торгуулийн хуудас авсан хэрнээ торгуулиа төлөөгүй, торгууль төлөлтийн хугацаа хэтэрсэн жолооч нарт хариуцлага тооцохоо Автотээврийн үндэсний төв, нийслэлийн Замны цагдаагийн газар, нийслэлийн Замын хөдөлгөөний удирдлагын төвөөс мэдэгдлээ.