Хөвсгөл нуурыг ЮНЕСКО-ийн Дэлхийн шим мандлын сүлжээнд бүртгэсэн тухай батламжийг гардуулав

админ
2022 оны 7 сарын 10

Arslan.mn

Монгол Улсын Ерөнхийлөгч Ухнаагийн Хүрэлсүх өнөөдөр НҮБ-ын Боловсрол, шинжлэх ухаан, соёлын байгууллага /ЮНЕСКО/-ын Ерөнхий захирал Одри Азулейг хүлээн авч уулзлаа.

Уулзалтын эхэнд Монгол Улсын Ерөнхийлөгч Монгол Улс ЮНЕСКО-д нэгдсэний 60 жилийн ойгоор айлчилж буйд талархал илэрхийлж, Монгол оронд тавтай морилохыг хүслээ.

Монгол Улс нь төрт ёсны түүхэн уламжлалтай, өв соёлын өлгий нутаг гэдгийг онцлон тэмдэглэж, Монгол орны байгалийн үзэсгэлэнт газруудын онгон дагшин байдлыг хадгалах, соёлын биет болон биет бус өвийг хамгаалах болон бусад чиглэлд хамтын ажиллагааг бүхий л хэлбэрээр өргөжүүлэн хөгжүүлэхийн төлөө байгаагаа хэлэв.

Ерөнхий захирал Одри Азулей Монгол Улс нь газар зүйн байрлал, түүх, соёлын өвөрмөц онцлогтой орон гэдгийг дурдаж, хоёр талын хамтын ажиллагаа идэвхтэй өргөжин хөгжиж буйд сэтгэл хангалуун байгаагаа илэрхийлэв.

Тухайлбал, ЮНЕСКО-гийн Дэлхийн шим мандлын сүлжээнд Хөвсгөл нуурын байгалийн цогцолборт газрыг зургаадугаар сарын 15-ны өдөр бүртгэсэн тухай танилцуулж, баяр хүргэлээ.

Монгол Улсын Ерөнхийлөгч дэлхийн цэнгэг усны нөөцийн 2 хувь, Монгол Улсын цэнгэг усны нөөцийн 70 гаруй хувийг дангаар бүрдүүлдэг Хөвсгөл нуурыг Дэлхийн шим мандлын сүлжээнд бүртгэсэнд Монголын ард түмний нэрийн өмнөөс гүн талархал илэрхийлэв.

Ерөнхий захирал Одри Азулейн айлчлалын үеэр Монгол Улсын Засгийн газар, ЮНЕСКО-гийн хооронд 2022-2029 онд хамтран ажиллах тухай Харилцан ойлголцлын санамж бичгийг байгуулж байгааг сайшаалаа.

Монгол Улсын нутаг дэвсгэрт оршиж буй дэлхийн хүн төрөлхтний өв, соёлыг хадгалан хамгаалахад Монгол Улс онцгой анхаарал хандуулна гэдгийг хэллээ.

Уулзалтын үеэр ЮНЕСКО-гийн Ерөнхий захирал Одри Азулей Хөвсгөл нуурыг Дэлхийн шим мандлын сүлжээнд бүртгэсэн тухай батламжийг гардуулав.

Ташрамд дурдахад, Монгол Улсаас ЮНЕСКО-д одоогоор нийт 32 өв болон байгалийн цогцолборт газрууд бүртгэгдээд байна. Үүнд манай улсаас ЮНЕСКО-ийн Дэлхийн өвийн жагсаалтад одоогоор нийт 5 өв бүртгэгдсэн байна.

Мэдээнд өгөх таны үнэлгээ?
Like an post Love an post
haha an post
wow an post
yay an post
sad an post
ouch an post
confuse an post
angry an post
638600
0 эможи

keyboard_arrow_up