Монгол Улсын тав дахь Ерөнхийлөгч Х.Баттулгын бүрэн эрхийн хугацаа өнөөдрөөр дуусгавар болж байна. Тэрбээр төрийн тэргүүний суудлаасаа буухын өмнө нийгэмд том хар толбо үлдээгээд явах гэж байна. Учир нь тавдугаар сараас эхэлсэн шагнал гардуулах үйл ажиллагаа өнөөдрийг хүртэл үргэлжиллээ.

Тодруулбал, тавдугаар сарын эхнээс Ерөнхийлөгч Х.Баттулга төрийн дээд одон медалийг олноор хүртээсний зэрэгцээ Улаанбаатар хотод "Эхийн алдар" одонг өөрийн биеэр гардуулсан юм.  16 мянган хүн шагнасны 11 мянга нь “Алдарт эх” гэнэ. Бид шагнал авч байгаа хүмүүсийг буруутгах гэсэнгүй. Төрийн дээд шагнал олгох ёстой ганц хүн нь зарлиг гаргаж, гавьяа зүтгэлээ үнэлүүлж байгаа иргэдийн хувьд баярт үйл явдал. Гэхдээ цаг үеэ ололгүй, халдварын үед зохион байгуулалт муутайгаар хүмүүсийг нэг дор цуглуулж шагнал гардуулсан нь л буруу... 

Өмнө нь “шагналын хур” буудаг л байсан. Тэгэхдээ Ерөнхийлөгч нь цөөн хэдэн хүнд өөрөө гардуулаад, бусдыг нь аймаг хот, сум дүүргийн удирдлагууд цөөн цөөнөөр нь дуудаад хүртээчихдэг байлаа.

Энэ жил ийм их өвчин тахалтай үед Ерөнхийлөгч нь Төрийн ордондоо цуглуулаад заавал бүх хүний энгэр зааманд хүрч байж тараадаг нь ямар учиртай юм бол гэж би бодоод олохгүй л байна.

Д.Сүхбаатарын талбай бол олон хоног наадмын талбай шиг боллоо шүү дээ. Нэг эх одон авахад л нөхөр, хүүхдүүд нь гээд таваас доошгүй хүн очдог юм байна. Аав ээж, ах дүү, найз нөхөд нь, зурагчин, сэтгүүлч гээд замаа алдсан юм байхаа. Юун амны маск, хоёр метрийн зай, үнсэж, үнэртэхгүй байх. 

Мөн тавдугаар сарын 30-нд Баянхонгор аймгийн нутагт орших Их Богд хайрханы тэнгэрийг тайх анхны төрийн тахилгын ёслол болж, Ерөнхийлөгч Х.Баттулга УИХ-ын дарга Г.Занданшатар, УИХ-ын гишүүн С.Ганбаатар, УИХ-ын гишүүн А.Адъяасүрэн, Монгол Улсын Ерөнхийлөгчийн Тамгын газрын дарга Ө.Шижир, Монгол Улсын Ерөнхийлөгчийн Аюулгүй байдал, батлан хамгаалахын бодлогын зөвлөх Л.Болд, Зэвсэгт хүчний Жанжин штабын дарга, Хошууч генерал Д.Ганзориг, Баянхонгор аймгийн Засаг дарга Д.Мөнхсайхан нарын албан ёсны төлөөллийн хамт оролцсон. 

Энэ үйл явдлаас хоёр хоногийн дараа Баянхонгор аймагт COVID-19-ийн халдвар илрэв. 

Энэ бүхний үр дүнд Улаанбаатар хот дахь халдварын тоо огцом нэмэгдэж, 400 гаруй хүн амь насаа алдсанд Ерөнхийлөгч Х.Баттулгын шагналын хур том хувь нэмэр оруулав.