Ардчилсан намын гишүүд, дэмжигчдийн холбооны тэргүүн Т.Хасбаатар өнөөдөр хэвлэлийн бага хурал хийж,  "Манай холбооны удирдах зөвлөл хуралдаад, Ардчилсан намын дарга Л.Гантөмөрийг тус намын гишүүнчлэлээс хасаж хөөх шийдвэр гаргасныг албан ёсоор мэдэгдэж байна." гэсэн юм.

Тэгвэл  түүний хийсэн мэдээлэлтэй холбогдуулан АН-аас МЭДЭГДЭЛ гаргажээ.

УГ МЭДЭГДЭЛД:

"Сошиал орчинд өөрийгөө "Ардчилсан намын гишүүд, дэмжигчдийн холбоо" гэх ТББ-ыг төлөөлж байна хэмээн хэвлэлийн хурал хийж буй иргэн Т.Хасбаатар нь Ардчилсан намын гишүүний бүртгэлд бүртгэлгүй тул Ардчилсан намын ямар нэгэн үйл ажиллагаанд оролцох боломжгүй юм.

Тэрээр 2016, 2020 оны УИХ-ын сонгуульд Өвөрхангай аймагт бие даан нэр дэвшсэн гэх мэдээллийг холбогдох газраас бидэнд мэдэгдсэн. Үүнээс хойш иргэн Т.Хасбаатар нь Ардчилсан намд гишүүнээр элсэх хүсэлтээ өнөөдрийг хүртэл ирүүлээгүй болно.

Иймд түүний хэвлэл мэдээллийн байгууллагаар дамжуулан хийсэн дээрх мэдэгдэл нь олон нийтийг төөрөгдөлд оруулсан үндэслэлгүй, хууль бус үйл ажиллагаа болохыг үүгээр мэдэгдэж байна" гэжээ.