Ардчилсан Намын байртай холбоотой асуудлаар тус намын Үндэсний бодлогын хорооны гишүүд өнөөдөр мэдээлэл хийлээ. 

АН-ын ҮБХ-ны гишүүн А.Цэрэнбат "2013 онд намынхаа байрыг шинэчилнэ гэж Худалдаа Хөгжлийн банктай гэрээ хийж, байраа тус банканд өгч буулгуулж байсан. Түүнээс хойш 10 жил боллоо. 

Намын өмч хөрөнгө байрны тухайд ямар ч эзэн алга. Сүүлийн гурван жилийн турш бид Худалдаа Хөгжлийн Банктай шүүхийн маргаан үүсгэх гэж оролдсон боловч шүүхээс АН-ыг төлөөлөх хүн алга, маргаантай байна гэдэг хариуг өгдөг. Гэрээний дагуу бол 25 давхар, хурлын заалтай, залуучууд нь цугладаг, үзэсгэлэн гаргадаг, мэтгэлцээн явуулдаг, бодлогын судалгааны байруудтай АН-ын байр баригдах хугацаа өнгөрөөд таван жил болж байна. 

Намын ялагдалд энэ бүхэн нөлөөлсөн гэж бид харж байгаа. Яагаад гэвэл нэгдсэн байргүй, гишүүд нь цуглах газаргүй. Нам гэдэг чинь үнэт зүйл, оюун санаа, бодлогын мэтгэлцээний төв байдаг.

АН-ын эд хөрөнгийг дээрэмдэж, намыг хүчин мөхөс байлгах зорилготой, зохион байгуулалттай бүлэглэл АН-д үүссэн байна." хэмээлээ.