Авлигатай Тэмцэх Газраас нүүрсний хулгайн асуудлаар хэргийн мөрдөн шалгах ажиллагааны явцыг өнгөрсөн долоо хоногт мэдээллэсэн. 

Энэ үеэр Мөрдөн шалгах хэлтсийн албаны дарга М.Даваатогтох дараах мэдээллийг өгөв. Тэрбээр "Нүүрсний хулгайн гэх асуудалтай холбоотойгоор нийт 22 хэрэгт мөрдөн шалгах ажиллагаа явуулж байна. 15 хүнийг хойшлуулшгүйгээр баривчилж, 10 хүнд цагдан хорих арга хэмжээ авсан.

Одоогоор нийт 35 хүнийг яллагдагчаар татсан. Үүнээс 

• хахууль авах гэмт хэрэгт долоо
• хахууль өгөх гэмт хэрэгт 16
• албан тушаалын байдлаа урвуулсан хэрэгт найм,
• үндэслэлгүйгээр хөрөнгөжсөн гэмт хэрэгт хоёр хүнийг яллагдагчаар татаж, мөрдөн шалгах ажиллагаа явуулж байна.

Мөрдөн шалгах ажиллагааны хүрээнд нүүрсний олборлолт, тээвэрлэлт, төрийн өмчийн хөрөнгөөр бараа, ажил үйлчилгээ худалдан авах явцад дараах албан тушаалтнууд шууд болон шууд бусаар оролцсон нөхцөл байдал тогтоогдож байна" гэв. 

АТГ-аас зарласан нүүрсний хэрэгт холбогдсон хүмүүсийн нэрс дунд Эрхэт Монгол группийн үүсгэн байгуулагч Х.Манданхбаяртай холбогдох хэрэг орсон байв. Х.Мандахбаяр нь Өмнөговь аймгийн МАН-ын хорооны дарга төдийгүй МАН-ын генсек Д.Амарбаясгалантай олон жил ойрын хүрээлэлд нь явсан нэгэн. 

Тэгвэл Х.Мандахбаярын нүүрсний хэрэгт шалгагдаж байгаад МАН-аас ямар хариуцлага тооцох талаар ЗГХЭГ-ын дарга, МАН-ын генсек Д.Амарбаясгалангаас тодруулахад "Хууль хяналтын байгууллага нь нүүрсний хэргийг шалгаад гэм буруутай нь тогтоогдвол Х.Мандахбаярыг Өмнөговийн МАН-ын хорооны даргаас нь чөлөөлнө, цаашид улс төрийн албан тушаал хашихыг нь хориглох хүртэл хариуцлага яригдана" гэлээ. 

Нүүрсний хулгайн хэргээр Засгийн газар хүний өөрийн гэлтгүй хариуцлага тооцох нь тодорхой болсон бололтой!