АН-ын дарга С.Эрдэнэ болон бусад удирдлагууд цаг үеийн асуудлаар мэдээлэл хийлээ.

Энэ үеэр АН-ын дарга С.Эрдэнэ "Бид өнгөрсөн хоёр жилийн хугацааны маргаанд цэг тавилаа.  Өөрөөр хэлбэл бүх зүйл ном журам, хуулийн дагуу шийдэгдсэн. Нэн тэргүүнд Үндэсний бодлогын хорооны бүтэц зохион байгуулалтыг шинэчлэх, боловсронгуй болгохоор ажиллаж байна.

Мөн бид сөрөг хүчний намын хувьд идэвхтэй, олон асуудалд анхаарлаа хандуулан ажиллах шаардлагатай байна. Нийгэмд үүсээд буй аливаа хямрал, асуудалд тухайн цаг үеийн эрх баригч хариуцлага хүлээх ёстой ч өөрсдийн алдааг Ардчилсан намд тохох гэж оролддог ба бид үүнд хүлээцтэй, тэвчээртэй байсаар ирсэн ч одоо дуугүй суухгүй. 1990-ээд оноос хойш манай нам хэзээ ч олонх болж, эрх барьж үзээгүй ч ач холбогдолтой шийдвэр гаргаж, арга хэмжээг авч өөрчлөлт, бүтээн байгуулалтыг хийж чадсан." гэв.