Монгол Улсын 2022 оны төсөвт төрийн үйлчилгээний албан хаагчдыг хувийн хэвшилд гэрээт ажилтан байдлаар үе шаттай шилжүүлж, төрийн алба хаагчдын орон тоо, цалингийн зардлыг хэмнэхээр тусгасан. Гэвч олон жил төрийн үйлчилгээний салбарын 50 гаруй ажилтан болон МҮЭ-ээс дээрх шийдвэрийг эсэргүүцэж, төрийн албаны цомхтголыг удирдах албан тушаалаас эхлэхийг шаардаж байгаа юм.

Тэгвэл эрх баригч МАН-ын бүлэг өнөөдрийн хуралдаанаар дээрх асуудлыг хэлэлцэж, ирэх онд төрийн үйлчилгээний алба хаагчдын цалин, урамшууллыг 2021 оны түвшингээс бууруулахгүй байхаар санал нэгдсэн байна. Улмаар Засгийн газар лхагва гаригийн ээлжит хуралдаанаар энэ асуудлыг хэлэлцэж, орон нутгуудад чиглэл өгөхөөр болсон байна.

УИХ дахь МАН-ын бүлгийн дарга Д.Тогтохсүрэнгийн мэдээлснээр бүлгээс төрийн үйлчилгээний алба хаагчдыг гэрээт болгох асуудлыг дэмжээгүй. Хуучин хэвэнд нь оруул гэдэг чиглэлийг өгсөн байна.

Тиймээс нэмэгдэл хөлс болон тэтгэвэрт гарахад нэг удаа олгодог 36 сарын цалинтай тэнцэх тэтгэмжийг хэвээр үргэлжлүүлэн олгох бөгөөд ирэх онд төрийн үйлчилгээний салбарын ажилчдын цалин хөлс, нэмэгдэл урамшууллыг 2021 оны түвшингээс бууруулахгүй, төрийн албан хаагч хэвээр нь ажиллуулахад шаардлагатай төсвийн хөрөнгө байгаа гэсэн юм. Засгийн газрын түвшинд ковидын хуулиар энэ асуудлыг зохицуулах бүрэн боломжтой гэж харж байгаа аж. Тиймээс өнөөдөр бүлгээс энэ ондоо багтаж яаралтай арга хэмжээ ав гэдэг чиглэлийг Засгийн газарт өгсөн байна.