Хоёр хуваагдсан АН-ынхны дотоод тэмцэл өдгөө өлсгөлөн болж хувираад байна. Харамсалтай нь тэд дотоод зөрчлөө төрд гаргаад зогсохгүй иргэдийг турхирч эхэллээ.

Өчигдөр эв нэгдлийн бэлгэдэл болсон Ерөнхийлөгч талбай дээр ирээд шүдэнз зурсны ачаар өнөөдөр Н.Алтанхуяг, О.Цогтгэрэл тэргүүтэй өлсөгчдийн талаас урьдчилан бэлтгэсэн жагсаалаа төв талбайд эхлүүлсэн.

Тэгвэл  М.Тулгат даргатай АН-ын удирдлага, гишүүд мөн цуглаж, мэдээлэл хийлээ.

Тэдний зүгээс Ерөнхийлөгч Х.Баттулга талбай дээр жагсаал хийж буй бүлгийн гишүүдтэй очиж уулзахдаа “Манай тэр, энэ хаана байна” хэмээн өөрийн хүмүүсээ бүртгэсэн үйлдэл нь ардчилалд аюул учруулж байгаагийг илрэл хэмээн тодорхойлоод Монгол Улсад барууны үзэл баримтлалтай нам гэж байхгүй болохын эхлэлийг тавьчихлаа гэв.

Улаанбаатар хотын захирагч асан Э.Бат-Үүл “АН-аас нэр  дэвшиж Ерөнхийлөгч болсон Х.Баттулга ардчилсан 30 жилийг “Завхарсан 30 жил” гэж хэлж байсан” гэдгийг онцлов.

Ерөнхийлөгчийн сонгуульд АН-аас нэр дэвшээд буй С.Эрдэнэ "Өнөөдөр ардчиллыг устгах, АН-ыг устгах төлөвлөгөөтэй, тодорхой зорилготой улстөрийн үйл ажиллагаа эртнээс эхэлсэн юм аа. Өнөөдөр эхлээгүй. УИХ-д АН-ын нэр зүүсэн 11 гишүүн гэх хүмүүсийн дэргэд бид амьд ажиллаж байсан юм. Бид амьд дуу хоолойгоо хүргэж чаддаг байсан юм аа.

Өнөөдөр энэ 11 гишүүн хэний төлөө, юуны төлөө Сүхбаатарын талбай дээр өлсөж цангаж байгаа нэртэй хэвтэж байгаа юм бэ? Яг үнэндээ эдгээр хүмүүс өнөөдрийн эрх барьж байгаа Монгол Улсын Ерөнхийлөгч Х.Баттулга, АН-аа тухайн үед нулимаад, орхиод, урваад гараад явсан, АН-аар улстөр хийж УИХ-д орж ирсэн Н.Алтанхуяг гэдэг нөхрийг хэн бэ гэдгээ тодорхой харуулсан.

Ковид цар тахал тархаж байх үед тэр хүмүүс хаана байсан юм бэ? Иргэд чинь өчнөөнөөрөө үхэж үрэгдэж байхад тэр хүмүүс хаана байсан юм бэ? Энэ асуудлыг бид нухацтай сайн ойлгож авах ёстой юм аа. Шаардлагатай гэж үзэх юм бол улс орон даяар, Улаанбаатар даяар бид эсэргүүцлийн хөдөлгөөн, жагсаал цуглаан зохион байгуулж, тэмцнэ. ” гэв.

Ийнхүү АН-ын дотоод хагаралдаан өлсгөлөн болон хувирсан бол өнөөдрөөс  мөнгөний өрсөлдөөн рүү шилжжээ. Тодруулбал, яг одоогийн байдлаар талбай дээр өлсөж буй АН-ын бүлгийн гишүүдийг тойроод жагсагчид цугларч эхэлсэн бол нөгөө АН болох М.Тулгатын талаас “Шонхор товер”-ын гаднах талбайд 300 орчим хүнийг цуглуулаад байна.

Өлсөгчдийн  талаас хөл хориог сулруулахтай  зэрэгцэн иргэдийг цуглуулж, жагсаал цуглаан зохион байгуулахаар эртнээс төлөвлөсөн бол  С.Эрдэнийн тал ч мөн үүний эсрэг тэмцэхээр шийдсэн гэнэ. Ингэснээр Н.Алтанхуяг, А.Адьяасүрэн нарын санаачилгаар АН-ын бүлгийн гишүүд тус бүр 100 сая төгрөг гаргаж, жагсаал цуглааныг санхүүжүүлж эхэлсэн гэх мэдээлэл гарч эхэллээ.