АН VII Их хурлаа ирэх ням гаригт хийнэ. Энэ удаагийн Их хурлаараа намын даргаар сонгогдсон С.Эрдэнийг батламжлахаас гадна Үндсэн дүрмээ эцэслэн батална гэсэн мэдээлэл байсан юм. Гэвч намынхаа Үндсэн дүрмийг бүхэлд нь шинэчлэн батлахгүйгээр нэмэлт, өөрчлөлт оруулахаар болсон гэдгийг Үндсэн дүрмийн шинэчилсэн найруулгын төсөл боловсруулах ажлын хэсгийн ахлагч Ш.Түвдэндорж дуулгалаа. Тиймээс энэ удаагийн Их хурлаараа намын даргаа баталж, бүтцээ шинэчлэх юм байна. Мөн ҮЗХ-гоо Үндэсний бодлогын хороо болгон өөрчлөхөөс гадна нийслэл, аймаг, дүүрэг, сумын намын хороо, үүрдүүдээ шинэчлэн байгуулахтай холбоотой өөрчлөлтийг Үндсэн дүрэмдээ оруулахаар төлөвлөжээ. Улмаар ирэх тавдугаар сард VIII Их хурлаа хийж намынхаа үзэл баримтлалыг тодорхойлсон Үндсэн дүрмээ бүхэлд нь батлах аж.