Сонгуулийн Ерөнхий хорооноос Иргэний Зориг Ногоон Намыг 2016 оны УИХ-ын сонгуульд оролцуулахыг бүртгэхээс татгалзсантай холбогдуулан мэдээлэл хийлээ. Тус намын дарга Ц.Ганхуяг “СЕХ Сонгуулийн тухай хуулийн 121.2 дахь болон 124.3.2 дахь заалтыг тус тус үндэслэн ИЗНН-ыг сонгуульд оролцуулахаар бүртгэхээс тазтгалзсан тогтоолыг 2016 оны тавдугаар сарын 2-ны өдөр гаргасан. Гэтэл манай намд албан ёсоор тавдугаар сарын 4-ний өдрийн 08:45 цагт уг шийдвэрээ хүлээлгэн өгсөн.

СЕХ бүртгэхээс татгалзсан зөрчлийг арилгах бололцоог манай намд олгоогүй гэж үзэж байна. Түүнчлэн СЕХ-ноос ирүүлсэн тогтоолд дурдсан бүртгэхээс татгалзсан шалтгаан нь эрх зүйн хувьд тус намыг 2016 оны УИХ-ын Сонгуульд оролцохоор бүртгэхээс татгалзах үндэслэл болохгүй хэмээн үзэж байна.

Иймд ИЗНН Сонгуулийн тухай хуулийн 111.4.2-т заасны дагуу Захиргааны хэргийн давж заалдах шатны шүүхэд анхан шатны журмаар нэхэмжлэл гаргаж СЕХ-ны шийдвэрийг түдгэлзүүлэхийн төлөө ажиллахаа мэдэгдэж байна” гэлээ.  Харин СЕХ-ны дарга Ч.Содномцэрэн хэлэхдээ “ИЗНН-ын бичиг баримт ч учир дутагдалтай байсан. Тогтоол дээрээ намын дарга С.Оюун гарын үсэг зураагүй байсан. С.Оюун дарга өөрөө ирж тайлбараа өгсөн. ИЗНН гурван даргатай. Сонгуульд орох хүсэлтэд Д.Ганхуяг дарга л гарын үсэг зурсан байна. Зурсан дарга нь Улсын Дээд шүүхээс албан ёсоор баталгаажуулаагүй байсан. Энэ мэт бичиг баримтын зөрчилтэй байсан учраас ИЗНН-ыг бүртгэхээс татгалзсан” гэсэн юм.