Ардчилсан намын Үндэсний зөвлөлдөх хорооны хурал энэ 3-р сард болно гэсэн яриа байгаа. Гэвч тус намын гишүүдийн дундах яриагаар 4 сарын сүүлээр хуралдах бололтой. Учир нь тус намын ҮЗХ-ны гишүүдийг нэг дор цуглуулах тун бэрх байгаа гэнэ. Нэгд сонгууль ойртсон учир ҮЗХ-ны гишүүн бүр амбиц гаргах болжээ. Зарим нь намын удирдлагатайгаа тохиролцоо хийх тухай ч үг цухуйлгах болсон байна. Үүний цаад шалтгаан нь ҮЗХ-ны гишүүн гэдгээрээ түрий барьж нэр дэвших эрхийг өвөртлөх гэсэн алхам гэх тайлбар тус намынханд явж байна. Харин нөгөө талдаа АН-ын фракц хоорондын үл ойлголцол өндөр байгаа учраас ҮЗХ-ны хурлын хуралдуулж дөнгөхгүй гэсэн таамаг. Хоёр дахь таамаг нь үнэнд илүү ойрхон очно. ҮЗХ-ны гишүүд тус тусдаа тоглож гүйхгүй. Харин фракцын зангилаан дээрээ тулгуурлан асуудлыг шийдэх нь гарцаагүй юм.

АН-ын эрх мэдлийг Шонхор фракцынхан атгаж байгаа. Гэвч тэд ҮЗХ дотроо төдийлөн жин дарахгүй. МоАХ фракцаас дэмжлэг аваад ч Шонхорынхон ҮЗХ-ны хурлыг хөдөлгөх хэмжээнийх биш гэсэн яриа гарчээ. Тэгэхээр Алтангадас, МҮДН, МоАН фракцын төлөөлөл л ҮЗХ-ны хурлын ирцэнд жин дарна. Мөн хуралдах эсэхийг шийднэ гэсэн яриа гараад байна. Бусад жижиг фракцын хувьд томчуудаа дагаж гүйхээс өөр гарц үгүй ээ. ҮЗХ-ны хувьд 228 гишүүнтэй. Үүнээс орж гарсан гишүүдийг томилох. Мөн сонгуульд хэрхэн оролцох мөрийн хөтөлбөрөө эцэслэн батлах ёстой. Үүнээс гадна хамгийн том шалгуур бол УИХ-ын гишүүнд өрсөлдөх 76 нэр дэвшигч, Мөн аймаг нийслэлийн иргэдийн хуралд өрсөлдөх гишүүдийг сонгох юм. Үүнд л хурлыг гол зорилго чиглэнэ. Гэвч АН-ын ҮЗХ-ны хурал 4 сарын дундаас хойш 5 сарлуу нэлээд ойртож хуралдаж болзошгүй байна.