Нөхөн томилогдох зургаан сайдуудын асуудалтай зэрэгцэн дэд сайд нар хэн байх тухай яригдаж эхэлсэн. Өнгөрсөн долоо хоногт хуралдсан АН-ын Гүйцэтгэх зөвлөл Дарханы АН-ын дарга Н.Мөнхдаш, Дорнодын АН-ын дарга Н.Цэрэнчимэд, Хөвсгөл аймгийн АН-ын дарга Ч.Батцогт нарыг дэд сайд болгох нь зүйтэй гэж шийдвэрлэсэн. Энэ нь Ардчилсан намын чухал шийдвэр байж.

Учир нь парламентад гишүүнгүй (2012 оны УИХ-ын сонгуульд АН-аас нэр дэвшигч ялагдсан),орон нутгийн сонгуулиар нам нь ялалт байгуулж чадаагүй, нэг үгээр хэлбэл ямар ч эрх мэдэлгүй байгаа орон нутгийн намын дарга нарт дэд сайдын албан тушаал хашуулж, төрийн ачааг үүрүүлэхээр шийдсэн нь энэ аж.

Тухайлбал, Булганы АН УИХ-ын сонгуулиар ялагдсан ч орон нутгийн сонгуулиар ялалт байгуулсан. Баянхонгор аймгийн АН УИХ, Орон нутгийн сонгуулиар ялсан гээд дээрх гурван аймгаас бусад аймгийн АН-ууд ямар нэг байдлаар төрийн ачааг үүрэлцэж байна.

Харин Дархан-Уул, Дорнод, Хөвсгөл аймгийн АН тийм биш. Дархан-Уул аймагт УИХ-д бие даагч С.Ганбаатар МАН-ын Д.Хаянхярваа. Орон нутгийн сонгуулиар МАН ялалт байгуулсан. Дорнод аймагт Бие даагч Х.Болорчулуун, МАН-ын Н.Номтойбаяр. Орон нутагт нь МАН ялалт байгуулсан. Хөвсгөл аймагт бие даагч Ц.Даваасүрэн, МАН-ын Л.Энх-Амгалан. Орон нутгийн сонгуулиар МАН олонхи болсон.

Эдгээр аймгийн АН парламентад ч төлөөлөлгүй, тухайн орон нутгийнхаа сонгуулиар ч ялалт байгуулж чадаагүй. 2012 оны сонгуулиудад орон нутгийн АН-аа ялагдалд хүргэсэн намын дарга нар нь дүрмээрээ дараагийн хүндээ суудлаа тавьж өгсөн. Ийм болохоор л АН дээрх гурван орон нутгийн намын дарга, гишүүдээ дэмжиж, дэд сайдын алба хашуулахаар шийдвэрлэж.

Харин өчигдөр хуралдсан Засгийн газрын хуралдаанаар дэд сайд нарыг томилж магадгүй гэсэн мэдээлэл байсан ч тус хуралдаанаар дэд сайд нарын асуудлыг хэлэлцээгүй байна.