Өнөөдөр 15.00 цагаас болохоор товлогдоод  байсан Ардчилсан намын ҮЗХ-ны хуралдаан 18.00 цаг хүртэл хойшилсон байна.  Тус намын УИХ-ын дахь бүлгийн гишүүдийн зүгээс ҮЗХ-ны хуралдах цагийг хойшлуулахыг санал болгосон гэнэ.

Чуулганы хуралдаан болон байнгын хорооны хуралдаан өнөөдөр болохоор товлогдсон учраас намын дотоод асуудлаас болж төрийн ажил цалгардах ёсгүй хэмээн АН-ын удирдлагууд үзжээ.

Ардчилсан намын ҮЗХ-ны хуралдаанаар хэд хэдэн асуудлыг хөндөн ярилцах юм. Нэгдүгээрт, намаасаа томилогдсон Ерөнхий сайдыг огцруулах кноп дарсан найман гишүүнийг АН-аас хөөхөөр Хяналтын зөвлөлөөс нь шийдвэрлэсэн бөгөөд үүнийг ҮЗХ-ны хуралдаанаар эцэслэн батлах учиртай. 

Мөн намын даргын асуудлыг хэлэлцэнэ. Түүнчлэн Шинэ Засгийн газрын тэргүүнээр хэнийг нэр дэвшүүлэх вэ гэдгээ ҮЗХ-ны хуралдаанаар шийдвэрлэх юм.