Улсын Их Хурлын Тамгын газраас санаачлан Улсын Их Хурлын гишүүний зөвлөх, туслах ажилтнууд, бие төлөөлөгчдөд зориулсан  чиглүүлэх сургалтыг өнөөдөр /2014.09.23/ Төрийн ордны “Б” танхимд  зохион байгуулав.

Энэхүү сургалтыг 2014 оны Улсын Их Хурлын намрын ээлжит чуулган эхлэх гэж буйтай холбогдуулан зохион байгуулж байгаа бөгөөд 80 орчим хүн хамрагдсан юм.

Улсын Их Хурлын Тамгын газрын Нарийн бичгийн дарга Б.Цэвээнпүрэв сургалтыг нээж үг хэллээ.

Тэрээр “Та бүхэн хууль тогтоох дээд байгууллагад нэр төртэй алба хашиж байгаа хүмүүс. Улсын Их Хурлын Тамгын газраас Улсын Их Хурлын гишүүний зөвлөх, туслах ажилтан, бие төлөөлөгчдийн ажиллах журам, тавигдах шаардлагыг боловсруулж дуусаад байна. Цаашид та бүхэн өөрсдийн мэдлэг, ур чадвараа дээшлүүлж, улам илүү хөгжүүлэх шаардлага тулгарна. Хууль санаачлах, хууль тогтоох бүрэн эрх Улсын Их Хурлын гишүүдэд байдаг. Энэ үйл ажиллагаагаа хэрэгжүүлэхэд нь Улсын Их Хурлын Тамгын газар арга зүйн зөвлөгөө өгч ажиллах үүрэгтэй. Мөн та бүхний ажлын үр дүнгээс хууль тогтоох үйл ажиллагааны чанар чансаа хамаарна гэдгийг хэлмээр байна” гэв.

Улсын Их Хурлын гишүүний зөвлөх, туслах ажилтнууд, бие төлөөлөгчид энэхүү сургалтад хамрагдсанаар Улсын Их Хурлын хуралдааны цахим систем, төрийн албан хаагчийн ёс зүй, хувийн ашиг сонирхлын болон хөрөнгө орлогын мэдүүлэг мэдүүлэхэд анхаарах зүйлс, хэвлэл мэдээллийн талаар анхаарах зүйлс зэрэг олон чухал ойлголт, мэдээллийг авах бөгөөд сургалтыг Мэдээллийн технологийн хэлтсийн дарга Ж.Элбэгзаяа, Хэвлэл мэдээлэл, олон нийттэй харилцах хэлтсийн ахлах референт Б.Янжинлхам, референт Ш.Содномжамц, Хууль зүйн үйлчилгээний хэлтсийн дарга Ж.Дашдорж нар удирдлаа.

Мөн Төрийн Албаны зөвлөлийн сургалт хариуцсан мэргэжилтэн Б.Нямсүрэн, Авлигатай тэмцэх газрын  ахлах ажилтан, ахлах комиссар Б.Өлзий нар төрийн албан хаагчийн ёс зүй, хувийн ашиг сонирхлын болон хөрөнгө орлогын мэдүүлэг мэдүүлэхэд анхаарах зүйлсийн талаар сургалт явууллаа.