"Эрдэнэт үйлдвэр" ТӨҮГ-ын овоолго ашигласны төлбөр төлдөггүй компаниуд байна. Тиймээс байгалийн баялгаас ард түмэн хүртэх боломжийг эрэлхийлж ажлын хэсэг өнөөдрөөс ажилдаа орсон гэж өчигдөр  ЗГХЭГ-ын дарга С.Бямбацогт мэдэгдсэн.

Тэрээр хэлэхдээ, " Ялангуяа Эрдэнэт үйлдвэрт овоолгын баялгаас ард түмэн биш, гурван компани ашиг хүртдэг. Энэ бол хаягдал биш, энэ бол баялаг. Тиймээс  Ачит Ихт, Эрдмин, Зэс эрдэнэ компаниудын үйл ажиллагаатай танилцлаа. Байгалийн баялгаас ард түмэн хүртэх боломжийг эрэлхийлж ажлын хэсэг өнөөдрөөс ажилдаа орсон." гэсэн юм.

Тухайлбал, “Эрдэнэт” үйлдвэрийн овоолгыг ашигладаг гурван компанийн нэг болох "Зэс эрдэнэ хувь" компани туршилтын нэрээр овоолго ашигласны төлбөр, холбогдох татвар хураамж төлдөггүй байна.

Хамгийн ноцтой нь,  “Зэс эрдэнийн хувь” компани нь УИХ-ын хэд хэдэн гишүүдийн ивээлд багтсан гэх мэдээлэл бий. Энэ талаар өмнө нь ЗГ-ын БЭТ-ээр томилогдсон Ж.Батзандан “Эрдэнэт үйлдвэрийн үүсмэл ордыг гурван компани эзэмшдэгээс нэг нь “Зэс эрдэнийн хувь” ХХК. Энэ компанийн ард УИХ-ын хоёр гишүүн байдаг бөгөөд дүүгээ захирлаар нь ажиллуулдаг" гэж мэдэгдсэн байдаг.

Тэгвэл байгуулагдсан цагаасаа өнөөг хүртэлх хугацаанд 232,5 тэрбум төгрөгийн борлуулалтын орлого олсон гэх "Зэс эрдэнийн хувь” ХХК-ийн 70 хувийг УИХ-ын гишүүн Э.Бат-Амгалангийн төрсөн дүү Э.Батбаяр, бэр Э.Энхмаа нарын нэр дээр бүртгэлтэй байдаг аж.

УИХ-ын гишүүний хамаарал бүхий хүмүүс уул уурхайн компанитай байж болох ч гол нь улс төрийн хүрээнийхний хардаад байгаачлан УИХ-д хоёр дахь удаагаа сонгогдон ажиллаж байгаа Э.Бат-Амгалан  гишүүний нөлөө ороогүй гэвэл хүн итгэхэд бэрх биз.

УИХ-д тухалсан эхний жилээс бизнес нь цэцэглэж, хөрөнгө орлого нь огцом өссөөр тэрбумтны жагсаалтад орж ирсэн УИХ-ын гишүүн Э.Бат-Амгалангийн  2024 онд АТГ-т шинэчлэн мэдүүлсэн ХОМ-ийг хүргэж байна.

Тэрбээр мэдүүлэгтээ:

Өөрийн орлого: ₮619 сая
Гэр бүлийн орлого: ₮120 сая
Хөрөнгө борлуулсны орлого: ₮0 сая
Орон сууц барилга байгууламж: ₮2,7 тэрбум /Орон сууц-1, Хашаа байшин-1/
Тээврийн хэрэгсэл: ₮200 сая  /Toyota, Land Cruiser 200-маркийн тээврийн хэрэгсэлтэй/
Мал аж ахуй: ₮0 сая 
Газар: ₮0 сая 
Үнэт эдлэл, урлаг, түүхийн үнэт зүйл: ₮220 сая
Хадгаламж: ₮93 сая 
Авлага: ₮300 сая 
Зээл:  ₮50 сая гэж мэдүүлжээ.