Монгол Улсын 34 дэх Ерөнхий сайд Г.Занданшатар засгийн бүтэц, гишүүдээ бүрдүүлэх зуур УИХ-д шинээр сонгогдсон болон жагсаалтаар орж ирсэн 30 гаруй гишүүд нэгдэн өнөөдөр 15 цагаас хойш шинэ Ерөнхий сайдад шаардлага хүргүүлээд байгаа аж.  

Тодруулбал, шаардлагад хуучин сайд хийж байсан гишүүдийг дахин сайдаар томилохгүй байхыг Ерөнхий сайд Г.Занданшатарт албан шаардлага болгон тавьжээ. Гэвч энэ үйлдэл нь хууль зөрчиж буй юм. Учир нь Үндсэн хуулийн 39.4 дүгээр зүйлд Ерөнхий сайдад олгосон сайдуудаа өөрөө томилох, чөлөөлөх, огцруулах бүрэн эрхэнд нь УИХ-ын гишүүд нь өөрсдөө ийнхүү халдаж байгаа юм. 

Шаардлага хүргүүлсэн гишүүд дунд шинэ танхимд эмэгтэй сайд нарын тоог 2-3-т барих, шинээр сонгогдсон сайд хийж байгаагүй гишүүдээсээ кабинетаа бүрдүүл гэсэн агуулгыг хүргүүлжээ. 

Хамгийн сонирхолтой нь Л.Оюун-Эрдэнийн засгийн газарт хоёр удаа Соёлын сайдаар ажилласан Ч.Номин хүртэл нэгдсэн байв. Түүний хувьд дараагийн засагт багтах боломжгүй гэдгийг урьдчилан хэлсэн аж. Шаардлага хүргүүлсэн гишүүдийн дийлэнх нь Л.Оюун-Эрдэнэ ерөнхий сайдын фракц, дэмжигчид  байгаа юм.

УИХ-д хууль зөрчиж гишүүн болсон Э.Болормаа нь Л.Оюун-Эрдэнийн засгийн үед нэг сайд 2-3 удаа томилогдоход дуугаараагүй мөртлөө шинээр сонгогдсон Ерөнхий сайдад "дарамт, шахалт" үзүүлж ийнхүү шаардлагад нэгдсэн байв. 

Улс орны эдийн засаг сайнгүй байгаа энэ үед "тооноор" орж ирсэн гишүүд шинэ Ерөнхий сайдад шахалт үзүүлэн, сандал суудлын төлөө "байкот" хийж байгаад иргэд, олон нийт цахим орчинд шүүмжлэлтэй хандаж буй.