Ерөнхий сайд Л.Оюун-Эрдэнэ "Авлигатай хийх тэмцэл мөрдөх байгууллагын түвшинд нэлээд асуудал боллоо. Шүүх дээр ч бүтэн шийдэгдэхгүй байна. Сүүлийн үед эдийн засаг өслөө, эдийн засгийн өсөлт хоосон тоо байна, өрх дээр очихгүй байна гэж байна. Санал нэг байна. Гэхдээ тоо байхгүй байхад хүртээмж ярих боломжгүй байдаг.

Өнөөдөр авлигатай хийх тэмцэл үр дүнд хүрсэн, хүрээгүй гэж ярьж байгаа нь сайн дэвшил. Авлигатай холбоотой асуудлыг бид өмнө нь ярьдаггүй байсан. Сүүлийн гурав, дөрвөн жил л ярьж, сонсгол хийж, бүх нийтээрээ авлигатай холбоотой асуудлыг ярьж, хэлж байна.

Тиймээс З.Дашдаваа даргыг дахин сунгах болсон шалтгаан ч тэр. Энэ байгууллагыг амь оруулсан. Энэ байгууллага амь орсон, авлига гэдэг асуудал бүх нийтийн асуудал болсон. Тиймээс эхлүүлсэн ажлаа дуусгах ёстой гэж сунгахаар оруулж ирж байгаа.

Би анх дэвшүүлэн гаргаж тавьж байсан баялгийн тэгш бус байдал, орлогын тэгш бус байдлаас нэг алхам ч ухрахгүй. Энэ бол миний амьдралын философи болохоос би албан тушаал дээр ажил хийж байгаа зүйл биш. Явж ирсэн буруу асуудлыг засна, засаж ч байгаа." гэв.