УИХ-ын Хууль зүйн байнгын хорооны хуралдаанаар АТГ-ын даргаар З.Дашдавааг улираан томилох асуудлыг хэлэлцлээ.

Энэ үеэр УИХ-ын гишүүн Б.Энхбаяр " Төрийн өмчит нэг компанийн захирлын сейфнээс 7.5 тэрбум төгрөг бэлнээр хураагдаж байсан. Энэ асуудалд Засгийн газар манлайлж ажиллах ёстой.  Авлигатай тэмцэх газар илрүүлээд шийтгээд байдаг. Гэтэл Засгийн газар сайн ажиллахгүй байна. АТГ-тай нягт хамтарч ажиллах хэрэгтэй.

Сейфнээс нь 7.5 тэрбум төгрөг гарсан С.Батдөл гэж нөхөр ШШГЕГ-ын харьяа Богд уулан дахь амралтын газар ялаа эдэлж байгаа юм билээ. Засгийн газар яаж ажиллаад байгаа юм бэ.

Тэгэхээр түүнийг амралтын газар амрааж байгаа сайд байна гэсэн үг. Өөрийг нь илчлээгүйн төлөө Богд ууланд тэр хүнийг амрааж байна гэсэн үг. Цаашдаа эзнийг нь олж шийтгэж байгаарай, эзэн нь тодорхой харагдаад байгаа шүү" гэв.

Хэргийг эргэн сануулахад, Баянгол дүүргийн Эрүүгийн хэргийн анхан шатны шүүх 2023 оны долоодугаар сарын 7-нд хэргийг хэлэлцэн түүнийг хахууль авсан, үндэслэлгүй хөрөнгөжсөн, мөнгө угаах гэмт хэргийг байнга тогтвортой үйлдсэн гэм буруутайд тооцож, нийтийн албанд томилогдох эрхийг нь долоон жил хасаж, нээлттэй дэглэмд 12 жил хорих ял оноосон байдаг. Дараа нь анхан шатны шүүхийн шийтгэх тогтоолыг нийслэлийн Эрүүгийн хэргийн давж заалдах шатны шүүх хэлэлцээд ялыг нь 10 жил болгож багасган, бусад заалтыг хэвээр нь үлдээсэн. 

Мөн өмнө нь  С.Батдөл нь  дархан цаазат Богдхан уулын Төр хурахын ам дахь ШШГЕГын харьяа “Төр хур” амралт, сэргээн засах сувилалд ажиллан ялаа эдэлж байна гэдгийг хэвлэл мэдээллийнхан удаа дараа мэдээлж байсан удаатай.