Монгол Улсын Их Хурлын дарга Д.Амарбаясгалан БНХАУ-д хийж буй албан ёсны айлчлалынхаа хүрээнд Бээжин хотын Шяоми цахилгаан автомашины үйлдвэр, Хятадын Хүний нөөцийн шинжлэх ухаан судлалын хүрээлэн болон Жинхуйнун хөдөө аж ахуйн мэргэжлийн хоршооны үйл ажиллагаатай танилцлаа.  

БНХАУ-ын нийслэл Бээжин хот нь дэлхийн хэмжээний технологийн төв болохоор зорьж, энэ хүрээнд спартап, инновацын төвүүдийг олноор хөгжүүлж байна. Үүний нэг боло Шяоми цахилгаан автомашины үйлдвэрт Улсын Их Хурлын дарга зочиллоо.

2021 оны гуравдугаар сараас тус компани ухаалаг, цахилгаан тээврийн хэрэгслийн үйлдвэрлэлийн салбарт үйл ажиллагаагаа явуулж эхэлжээ. Цагт 40 автомашин үйлдвэрлэж буй тус компани хиймэл оюун ухаан, роботуудыг үйлдвэрлэлдээ ашигладаг бөгөөд байгаль орчинд ээлтэй автомашиныг бүтээж байна.

БНХАУ-тай хийж буй худалдаа, эдийн засгийн хамтын ажиллагааны шинэ чиглэлд өндөр технологийн хөгжил, хиймэл оюун ухааныг чухалчлан авч үзэж буйг Улсын Их Хурлын дарга Д.Амарбаясгалан тодотголоо. Тэрбээр Бүх Хятадын Ардын Төлөөлөгчдийн Их Хурлын Байнгын хорооны дарга Жао Лөжитэй уулзах үеэрээ Монгол Улс, БНХАУ-ын цахилгаан автомашин үйлдвэрлэлийн гинжин хэлхээнд нэгдэх хүсэлтэй байгаагаа илэрхийлсэн юм.  

Мөн Улсын Их Хурлын дарга тэргүүтэй төлөөлөгчид Хятадын хүний нөөцийн шинжлэх ухаан судлалын хүрээлэнд зочилж, тус улсын төрийн албаны хүний нөөцийн бодлого, хэрэгжүүлж буй үр дүнтэй аргуудын талаар санал солилцлоо. Улсын Их Хурлын дарга Д.Амарбаясгалан уулзалтын үеэр манай улс мэргэшсэн, тогтвортой, чадварлаг төрийн албыг бий болгож, менежментийг олон улсын түвшинд хүргэхээр ажиллаж эхэлснийг дурдав. Тэрбээр дижитал технологи, хиймэл оюун ухааныг хүний нөөцийн бодлогодоо ашиглаж эхэлсэн тус улсын туршлагаас судлах хүсэлтэй байгаагаа илэрхийллээ.

БНХАУ нь төрийн албанд мэргэшсэн, авьяаслаг, чадвартай иргэдийг бэлтгэхэд анхаарлаа хандуулж, энэ хүрээнд хиймэл оюун ухаан, дижиталчлалыг ашиглаж байна. Түүнчлэн гадаад улс орнуудтай хэрэгжүүлж буй томоохон төсөл, хөтөлбөрүүдэд шаардлагатай нарийн мэргэжлийн боловсон хүчнийг бэлтгэхдээ богино хугацааны сургалтад хамруулж, шаардлагатай мэдлэг, чадварыг олж авахад анхааран ажиллаж буй бодлогоосоо танилцуулав. Тус хүрээлэн нь БНХАУ-ын Хүний нөөц, нийгэм хамгааллын яаманд шууд харъяалагддаг бөгөөд Засгийн газарт шаардлагатай судалгаануудыг гүйцэтгэж, төрийн бодлого шийдвэрт санал, дүгнэлт гаргаж, зөвлөгөө өгдөг байна.