УИХ-ын чуулганы өнөөдрийн хуралдаан эхэллээ. Хуралдаанаар Малын индексжүүлсэн даатгалын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслийг хэлэлцэж байна.

Шадар сайд С.Амарсайхан "Малын индексжүүлсэн даатгалын тогтолцоо үр дүнгүй байгаа гэдгийг ганц жишээгээр бид харж болно. 2023-2024 оны хооронд зудад нийтдээ 8 сая гаруй мал хорогдсон. Зах зээлийн хамгийн бага үнээр мөнгөн дүнг нь тооцож үзвэл 1.5-2 их наяд төгрөгийн хохирол учирсан.

Гэтэл индексжүүлсэн даатгалын журмаар 18 тэрбум төгрөгийн нөхөн олговор олгосон байгаа юм. Тийм учраас энэ журмыг шинэчилж, нөхөн төлбөрийг хүнд сурталгүй, шуурхай бодитой олгодог механизмыг бүрдүүлэх шаардлагатай байна.

Хоёрдугаарт, одоогийн индексжүүлсэн даатгалын системийг өөрчилж малын хорогдлыг бодитойгоор барагдуулдаг. Шууд үнэлгээний тогтолцоонд шилжих шаардлагатай. Өөрөөр хэлбэл малчин бүр даатгалд хамрагдах боломжийг бүрдүүлээд энэ хуулийн хэлэлцүүлгийн явцад сайжруулах шаардлагатай юм. Үр дүнтэй манай орны онцлогт тохирсон даатгалын тогтолцоог бий болгох шаардлагатай байна.

Монголын уламжлалт байгаль, цаг уур, орчинд тохирсон даатгалын системийг бүрдүүлж байж цаашид мал аж ахуйн салбарын тогтолцоо бүрдэнэ. Тэгэхээр ажлын хэсэг байгуулагдахаар гишүүд бүх зүйл дээр амьдралд ойр санаачилгууд гаргаж ажиллахыг хүсье. " гэв.