Авлигатай тэмцэх газар эрүүгийн 868 хэрэгт мөрдөн байцаалтын ажиллагаа явуулснаас өнгөрсөн долоо хоногт 4 хэргийг шүүхэд шилжүүлэх, 9 хэргийг хаах саналтай прокурорт хүргүүлэв. Мөрдөн шалгах ажиллагаанд одоогоор 855 хэрэг шалгагдаж байна.

Тухайлбал, УИХ-ын гишүүн Н.Наранбаатарт холбогдох хэргийг АТГ-аас шалгаж дуусан, прокурорын байгууллагад шилжүүлжээ.

Түүнийг бусдад хууль бус давуу байдал бий болгосон, үндэслэлгүй хөрөнгөжсөн гэх хэрэгт холбогдуулан шалгаж байгаа юм.

Тодруулбал, УИХ-ын гишүүн Н.Наранбаатарыг өөрийн хамаарал бүхий этгээд болох дүү болон найз нөхдийн холбоотой хүмүүстэй бүлэглэн БНХАУ-ын хөрөнгө оруулалттай нэр бүхий ААН болон тухайн компанитай нэгдмэл сонирхолтой нэр бүхий гадаадын хөрөнгө оруулалттай компаниудаар дамжуулан Тавантолгой орд газрын уурхайгаас нүүрс олборлох, борлуулах, худалдан авах, тээвэрлэх гэрээг байгуулах эрхийг олгоход нөлөөлж бусдад хууль бус давуу байдал бий болгосон, үндэслэлгүй хөрөнгөжсөн хэрэгт буруутган шалгаж буй.