Улсын Их Хурлын өнөөдрийн /2023.11.24/ чуулган эхэллээ. Чуулганаар УИХ-ын гишүүн Ш.Адьшаа, Н.Ганибал үг хэлж, хэлэлцэх асуудал руу орлоо.

Энэ үеэр УИХ-ын гишүүн Н.Ганибал "Их хурал дээр зайлшгүй хэлэлцүүлэх асуудал байна. Монголын мал аж ахуй, хөдөө аж ахуйн салбарт тулгамдсан хамгийн чухал асуудал бол өвөлжилт. Хоёр хоногийн өмнө болсон цасан шуурганы улмаас олон хүн төөрч, эрж хайх асуудал үүсээд байгаа. Тиймээс эдгээр асуудлыг яаралтай шийдвэрлэх асуудал үүсч байна. Малчид шатахуунгүй байна. Хэрэглээний хамгийн чухал хэрэгсэл болох портер, бонго нь түлшгүй байна. Үүнээс болоод малчид өвөлжөөндөө ч нүүж чадахгүй байна. 

Малчид малдаа явж байгаад төөрч, осгосон тохиолдолд амийг нь төрөөс нэхнэ шүү. 

Тээвэрлэлтээс болж өвөлжөөндөө өвс тэжээлээ ч буулгаж чадахгүй байна. Тиймээс УИХ-ын тогтоол гаргадаг ч юм уу, яаралтай арга хэмжээ авах шаардлагатай. Бодит амьдрал дээр болж байгаа зүйл алга." гэв.