Хөгжлийн банкны  чанаргүй 25 зээлдэгчийн нэрс, тэдний авсан зээлийн хэмжээг энэ оны нэгдүгээр сарын 23-нд мэдээлсэн. Үүнээс хойш тус банкийг тойрсон дуулиан одоо ч намжаагүй байна. 

Тодруулбал, Хөгжлийн банкинд 1,8 их наяд төгрөгийн чанаргүй өр зээлийн асуудал хуримтлагдсан байдаг.

Эдгээр чанаргүй зээлдэгчид дунд төрийн өндөр албан тушаал хашдаг хүмүүс багагүй хувийг эзэлж байгаа талаар бид өмнө мэдээлж байсан.

Тэгвэл  найдваргүй зээлдэгч тоонд багтсан ”НВЦ” компанитай Ч.Ундрам гишүүний нөхрийн нэр холбогдож байна. Тодруулбал, УИХ-ын гишүүн Ч.Ундрамын нөхөр Баярхүүгийн Наранцацралт нь ”НВЦ” компанийн захирал Ц.Баатарбилэгтэй хамтран “Эм Си Си Пи” ХХК-ийг эзэмшдэг ажээ.

“НВЦ” компани нь  Хөгжлийн банкнаас 2017 онд 21 сая ам.долларын зээл авсан байдаг. Гэвч таван жил өнгөрөөд байхад зээлийн үлдэгдлээс нэг төгрөгч ч төлөгдөөгүй буюу 21 сая ам.доллар хэвээр байгаа талаа мэдээлэл бий. Улмаар хуримтлагдсан хүү, торгуулийн хүүтэй нийлээд тухайн валютаар 26 сая 10 мянга 117 ам.доллар буюу төгрөгт шилжүүлвэл 74 тэрбум 115 сая 828 мянга 990 төгрөгийн зээлийн үлдэгдэлтэй, чанаргүй зээлийн ангилалд багтсан байгаа юм.