УИХ-аар хэлэлцүүлэх гэж байгаа Хөрөнгө оруулалтын тухай хуулийн төслийн талаар УИХ-ын Ёс зүй, хариуцлагын хорооны дарга Б.Бат-Эрдэнийн байр суурийг сонслоо.

Тэрбээр "Чуулганы хурлаар би байр сууриа илэрхийлсэн. Хэдэн жилийн өмнө УИХ-аар орж ирээд босго даваагүй унасан байдаг. Тиймээс яг тухайн үеийн  хуультай ижилхэн хуулийн төсөл байна. Энэ тал дээр анхаарч үзээч гэж хууль санаачлагч гишүүдэд хэлж бйасан. Гадаадын хөрөнгө оруулалтын тухай хуулийн төслийг хэлэлцэх бол үүнийг цогцоор авч үзээч. Зүгээр л оршин суух визтэй холбоотой асуудлыг оруулж ирж болохгүй.  Яг өнөөдрийн байдлаар Гадаадын хөрөнгө оруулалтын тухай хуулийн  зохицуулалт нь  дутуу байна гэхээсээ илүү  хуулийн хариуцлагын асуудал яригдаж байна. 

Гадаадын хөрөнгө оруулагчдыг хохироодог авлигыг зогсоож хариуцлага тооцох ёстой. Гэвч УИХ-ын ёс зүйн дүрмээр хариуцлага тооцох нөхцөл байхгүй. УИХ-ын Ёс зүй, сахилга хариуцлагын байнгын хороо бэлэгдэл төдий ажилладаг.

Бид тангараг өргөхдөө нийт иргэн, улсын ашиг сонирхлыг илэрхийлж ажиллахаа мэдэгддэг. Тэгэхээр УИХ-ын гишүүний ёсзүйтэй холбоотой асуудал яригдаж байна. Хуучин ёсзүйн дэд хороо байхдаа ч, байнгын хороо болсон ч нарийвчилсан дүрэм журам байхгүй. УИХ-ын гишүүний ёсзүйн шинэ дүрмэнд ард түмэн, хэвлэл мэдээллээр уучлал хүсдэг заалтыг оруулмаар байна. Одоо ёсзүйн алдаа гаргасан Д.Өнөрболор, П.Анужин, Х.Ганхуяг нарт хариуцлага тооцох ямар ч механизм байхгүй. Уучлал гуйдаг ганц зүйлийг л оруулж чадахгүй байна" гэв.