УИХ-ын чуулганы өчигдрийн хуралдаанаар Монгол Улсын Ерөнхийлөгчийн сонгуулийн тухай хуульд өөрчлөлт оруулах тухай хуулийн төслийг хэлэлцэж, баталлаа.

Тодруулбал, Үндсэн хуулийн цэцээс өмнөх болон одоогийн Ерөнхийлөгч нар дахин нэр дэвших нь Үндсэн хууль зөрчсөн явдал болно хэмээн дүгнэсэн. Уг дүгнэлтийг УИХ хүлээн авснаар Ерөнхийлөгчийн сонгуулийн тухай хуульд өөрчлөлт оруулах шаардлага бий болсон. 

Цэцийн дүгнэлтийг үндэслэн Ерөнхийлөгчийн сонгуулийн тухай хуульд өөрчлөлт оруулах тухай хуулийн төслийг боловсруулжээ. Ерөнхийлөгчийн сонгуулийн тухай хуульд дараах хоёр өөрчлөлтийг оруулжээ. 

Монгол Улсын Ерөнхийлөгчийн сонгуулийн тухай хуулийн 3.1.2. “нэр дэвшигч” гэж Монгол Улсын Үндсэн хуулийн 30 зүйлийн 2 дахь хэсэг, Монгол Улсын Ерөнхийлөгчийн сонгуулийн тухай хуульд заасан шаардлагыг хангаж Монгол Улсын Ерөнхийлөгчид нэр дэвшин бүртгүүлж, нэр дэвшигчийн үнэмлэх авсан Монгол Улсын иргэнийг ойлгохоор;

Монгол Улсын Ерөнхийлөгчөөр Монгол Улсын Ерөнхийлөгчийн сонгуулийн тухай хуулийн 3.1.2-т заасан шаардлага хангасан, Ерөнхийлөгчөөр сонгогдон ажиллаагүй, Монгол Улсын уугуул иргэн зөвхөн нэг удаа Ерөнхийлөгчөөр сонгогдох эрхтэй байх зохицуулалтыг тусгажээ. 

Ингэснээр өмнөх Ерөнхийлөгч нар болон одоогийн Ерөнхийлөгч дахин нэр дэвших эрхгүй болов. 

Хуулийг 2021 оны дөрөвдүгээр сарын 30-ны өдрөөс буюу өнөөдрөөс эхлэн дагаж мөрдөнө.