УИХ-ын чуулганы өчигдөрийн нэгдсэн хуралдаанаар сонгуулийн тухай хуулийн төсөл болон түүнийг дагалдан өргөн мэдүүлсэн хуулийн төслүүдийн хэлэлцүүлгийг хойшлууллаа.

УИХ-ын чуулганы нэгдсэн хуралдаанд 45 гишүүн оролцож, байнгын хорооноос оруулсан зарчмын зөрүүтэй саналын томьёоллыг хэлэлцүүлж эхлээд байсан ч зарим саналын томьёолол дутуу гэсэн шалтгаанаар хэлэлцүүлгийг баасан гарагт хийхээр боллоо. 1992, 2008 онд сонгууль явуулж байсан олон мандаттай, томсгосон тойрогтой, мажоритар тогтолцоог сонгож, хуульдаа тусгахаар тогтоод байгаа.

Өөрөөр хэлбэл том, жижиг тойрог хосолсон мажоритар тогтолцоо буюу "50+26" гэсэн хувилбар дэвшүүлээд байсныг өөрчилсөн байгаа. Хамгийн олон санал авсан, тухайн тойрогт ногдох мандатын тоотой тэнцүү тооны нэр дэвшигчийг УИХ-ын гишүүнээр сонгогдсонд тооцох юм.