УИХ-ын дөрвөн байнгын хороо өнөөдөр хуралдаж, энэ долоо хоногт чуулганы нэгдсэн хуралдаанаар хэлэлцэх хууль, тогтоолын төслүүдэд оруулах санал, дүгнэлтээ нэгтгэнэ.

• УИХ-ын Хууль зүйн байнгын хороо 09.00 цагт хуралдаж, Монгол Улсын Хүний эрхийн Үндэсний Коммиссын тухай, Эрүүгийн хуульд өөрчлөлт оруулах тухай хуулийн төслийг хэлэлцэнэ. 
• Эдийн засгийн байнгын хороо 10.00 цагт хуралдаж, Санхүүгийн хэрэглэгчийн эрхийг хамгаалах тухай, Орон сууцны тухай хуулийн шинэчилсэн найруулгын төслийг хэлэлцэж, Далай ашиглах тухай хуулийн шинэчилсэн найруулгын төслийг хэлэлцүүлэгт бэлтгэх ажлын баг байгуулах юм.
• Монгол Улсын 2020 оны төсвийн тухай хуулийн нийгмийн даатгалын шимтгэл хоёр хувиар нэмэх заалтад тавьсан Ерөнхийлөгчийн хоригийг УИХ хүлээн авсан. Тиймээс өнөөдөр 11.00 цагт Төсвийн байнгын хороо хуралдаж, төсөвтэй холбоотой зарим хуульд оруулах нэмэлт, өөрчлөлт оруулах асуудлыг хэлэлцэхээр товлосон байна.
• 14.00 цагт Нийгмийн бодлого, боловсрол, соёл, шинжлэх ухааны байнгын хороо хуралдаж, Инновацийн тухай хуульд нэмэлт, өөрчлөлт оруулах тухай хуулийн төслийг хэлэлцэхээр товлосон байна. Мөн тус байнгын хороо Шинжлэх ухааны академийн эрх зүйн байдлын тухай хуульд нэмэлт, өөрчлөлт оруулах тухай хуулийн төслийг хэлэлцүүлэгт бэлтгэх ажлын баг байгуулах аж.