Шадар сайдад Ө.Энхтүвшинг томилох асуудлыг хэлэлцэх үеэр УИХ-ын гишүүн Д.Тэрбишдагва байр сууриа илэрхийллээ.

Д.ТЭРБИШДАГВА: ТОМИЛОХООСОО ӨМНӨ ШАЛГААГААД, ТОМИЛСНЫХОО ДАРАА ДЭМЖИХ ЁСТОЙ

Засгийн газарт бүрэлдэхүүнд нэр дэвшиж буй хүмүүсийг ингэж шалгааж байгаад УИХ-ын гишүүддээ талархаж байна. Засгийн газрыг байгуулахад шүдийг нь үзэж, сүүлийг нь сөхөж үзэх ёстой. Засгийн газрын гишүүдээ нэг бүрчлэн ярьчихаад, томилогдсоных нь дараа харин дэмжих хэрэгтэй. Ярьж чадахгүй орой, үдэш болсон хойно цаг шахаж баталчихаад, болсных нь дараа шүүмжлээд эхэлдгээ больмоор байна. Өнөөдөр эхний хүн дээр олон асуулт тавьж, санал хэлж байгаа шигээ эрч хүчээ бууруулахгүйхэн шиг ажиллаарай.
Сайдад нэр дэвшиж байгаа хүмүүсийн үгийг ард түмэн, салбарууд нь сонсож байгаа. Тиймээс та бүхэн сайн үгээ сайн цэнэж, өнөөдөр ард түмнээсээ, салбараасаа эхний дүнгээ авах ёстой.

У.Хүрэлсүх эхлээд “Ардын засгийн газар” гэж ярьж байсан. Тэр үгээрээ яваарай гэж ерөөж байна.

Нэг шүүмжлэлтэй тал нь өнөөдөр 16 сайдаас тал хувь нь л сууж байна. Ард түмнээс сонгогдсон гишүүдийн асууж байгаа асуулт, гаргаж байгаа санал болгоныг улаан харандаагаар бичих ёстой. Тиймээс ЗГ гишүүд эхнээсээ бяр гаргахгүй шүү.

Ө.Энхтүвшин сайдын хувьд төрд ажилласан хүн алдаж, оносон олон л зүйлийг хийдэг. Монгол төрд, МАН-д хийсэн гавъяаг нь үнэлэх хэрэгтэй.