Өргөдлийн байнгын хорооны даргаар сонгогдоод байгаа Ж.Батзандан гишүүн нийслэлд оногдох УИХ-ын мандатын тоог нэмэгдүүлэх талаар мэдээлэл хийв. Тэрээр “365 мянган хүн амтай Баянзүрх, Налайх дүүрэгт гурван мандат байгаа. Өөрөөр хэлбэл нэг гишүүн 120 мянган хүнийг төлөөлж байна. Гэтэл Архангай аймаг 94 мянган хүн амтай, хоёр мандаттай. Ойролцоогоор Архангай аймгаас сонгогдсон нэг УИХ-ын гишүүн 47 мянган хүнийг төлөөлж байна гэсэн үг.

Дундговь аймаг 45 мянган хүн амтай, нэг мандаттай. Гэтэл Сонгинохайрхан дүүргийн нэг гишүүн 100 гаруй мянган хүнийг төлөөлж байна. Хэнтий аймаг 72 мянган хүн амтай, хоёр мандаттай. Тэгэхээр мандатын шударга бус төлөөлөл, мандатын шударга бус хуваарилалтын зарчмыг өөрчилье гэдэг саналыг иргэд олон нийт, улс төрийн намуудын зүгээс тавьж байгаа. Улаанбаатар хотод өнөөдрийн байдлаар нэг сая 400 мянган хүн амьдарч байна.

Гэтэл 48 мандатын 14 нь Улаанбаатарт, 34 нь хөдөө орон нутагт хуваарилагдаж байна. 14 гишүүн Улаанбаатар хотын сая 400 мянган хүнийг төлөөлж ажиллаж байна гэсэн үг. Үүнийг өөрчилье гэж байгаа юм. Хүн амынхаа тоотой ойролцоо байхаар мандатаа хуваарилах саналтай байна. Ингэх юм бол Улаанбаатарт 22 мандат оногдохоор байна. Харин хөдөө орон нутагт 26 мандат оногдохоор болж байгаа юм” гэлээ.