УИХ-ын чуулганы өнөөдрийн хуралдаанаар 9 асуудал хэлэлцэхээр төлөвлөөд байсан ч 2-ыг нь л хэлэлцлээ. Хуралдаанаар хэлэлцсэн эхний асуудал нь  “Засгийн газрын гишүүнийг огцруулах тухай” Улсын Их Хурлын тогтоолын төсөл байлаа. УИХ-ын гишүүн О.Баасанхүүгээс өргөн мэдүүлсэн Хууль зүйн сайд Х.Тэмүүжинг огцруулах эсэх тухай асуудлыг хаалттай хэлэлцсэн юм. Энэ асуудалтай холбоотойгоор Улсын ерөнхий прокурор Д.Дорлигжав, Цагдаагийн ерөнхий газрын дарга Т.Билигт, Тагнуулын ерөнхий газрын дарга Б.Ариунсан нар оролцож, гишүүдэд мэдээлэл хийж, 30 гаруй гишүүний асуултанд хариулт өгсөн байна. Үүний дараа 40 гаруй хүн уг асуудлаар санал хэлэхээр нэрээ өгсөн боловч МАН-ын бүлэг "Мэдээлэл хангалтгүй, тодруулах шаардлагатай асуудал байна" хэмээн завсарлага авсан байна. Энэхүү ажлын тав хоногийн завсарлага ирэх долоо хоногийн пүрэв гаригт дуусч, улмаар чуулганы хуралдаанаар огцруулах эсэх асуудлыг эцэслэн шийдэх юм.