Монгол Улсын Их Хурлын дарга Зандаахүүгийн Энхболд өнөөдөр /2015.04.23/  “Дэлхийн номын өдөр”-ийг тохиолдуулан Улсын Их Хурлын Тамгын газраас Төрийн ордонд зохион байгуулж буй номын өдөрлөгт зочлов.

Төрийн ордонд болж буй уг номын өдөрлөгт хэвлэл, номын худалдаа эрхлэгч 9 байгууллага оролцож, шинээр хэвлэгдсэн ном товхимолуудаа танилцуулан, худалдахын зэрэгцээ хууль тогтоох, бодлого боловсруулах чиглэлээр ажилладаг уншигчдынхаа санал хүсэлтийг авч байгаа юм.

Дэлхийн номын өдрийг тохиолдуулан Америкийн Монгол судлалын төвөөс УИХ-ын Тамгын газрын номын санд англи хэлээр хэвлэгдсэн хууль эрх зүй, эдийн засаг, маркетинг, менежмент болон бусад шинжлэх ухааны 163 нэрийн 430 гаруй номыг   хандивласан бөгөөд УИХ-ын дарга эдгээр бүтээлүүдийг үзэж сонирхсон юм.

Монгол Улсын Их Хурлын Тамгын газар 5 дахь жилдээ Дэлхийн номын өдрийг тохиолдуулан Төрийн ордонд  Номын өдөрлөг зохион байгуулж байна хэмээн  Улсын Их Хурлын Тамгын газрын Хэвлэл мэдээлэл, олон нийттэй харилцах хэлтэс мэдээлэв.