Google компани нь “Street View” зураглал болон Google соёлын хүрээлэн, Монголчууд ба дэлхийн өнцөг булан бүрээс ирэх зочдын Монгол улсыг үзэх, судлах аргыг өөрчлөх шинэ санааг Монголд нэвтрүүлэхээр Нийслэлийн Засаг даргын Тамгын газартай хамтран ажиллаж байгаа гэдгийг өнөөдөр / 2014.10.21 / зарлалаа. Энэхүү арга хэмжээнд Улсын Их Хурлын дарга З.Энхболд оролцож, үг хэлсэн юм.

Тэрээр хэлсэн үгэндээ, орчин үед шинжлэх ухаан, технологийн дэвшлийн ачаар дэлхийн өнцөг булан бүрт байгаа хүмүүс газар зүйн байршил, цаг хугацааны хязгаарлалтаас үл хамааран чөлөөтэй хамтран ажиллаж, сурч боловсорч, ажил хэрэг бизнесээ эрхлэх бүрэн боломжтой болж байна. Энэхүү дэвшлийг дагаад мэдээ, мэдээллийг хэрхэн зөв үр ашигтай аргаар цуглуулж, хадгалж, боловсруулж чадаж байна вэ гэдгээс аливаа хувь хүн, байгууллага, улс орны өрсөлдөх чадвар шууд хамаардаг боллоо. Сүүлийн үед томоохон хотуудын зарим үйл ажиллагааг Засаг дарга биш их хэмжээний өгөгдөл - Big Data дээр суурилсан мэдээлэл боловсруулах програмаар удирддаг болж байна. Бидний эргэн тойронд байгаа бүхий л юмс, ахуйн хэрэглээний болон инженерийн тоног төхөөрөмж зэргийг интернетээр дамжуулан удирддаг Internet of Things-ийн цаг үе айсуй явна. Дэлхий ертөнцийг бүрхэж буй энэхүү хувьсгалын цаана асар том мэдээллийн дэд бүтэц ажиллаж байдгийн нэг нь Google-ийн платформ юм. Монголчуудтай хамтран ажиллаж Google translate, Google Education, Google Developer чиглэлээр эхэлсэн ажлуудаа Google Street View, Google Culture Institute, Google Art Project, Google World Wonders төслүүдээр үргэлжлүүлж өөрийн мэдээллийн дэд бүтцэд Улаанбаатар хотын мэдээллийг оруулах төслүүдийг эхлүүлж байгаа Google компанид талархал илэрхийлье гэлээ.

Өнөөдрөөс НЗДТГ-ын лац болон тусгай камераар тоноглогдсон Google-ийн машинууд Улаанбаатар хот, хөдөө орон нутаг гээд орон даяар нийтийн эзэмшлийн гудамж, талбайн түвшний гэрэл зургийг авахаар явж эхлэх гэж байна. Мөн өнгөрсөн 6-р сард авсан зураглалуудыг өнөөдөр дэлхий нийтэд цацаж эхэлсэн юм.

Түүнчлэн Google нь Монгол улсын хамгийн их ач холбогдолтой 3 музейн болон соёлын хүрээлэн хоорондын түншлэлийг зарласан байна. Үүнд Монгол улсын үндэсний музей, Занабазарын нэрэмжит Дүрслэх урлагийн музей, Богдхааны ордон музей зэрэг багтжээ. Энэхүү арга хэмжээнд Нийслэлийн засаг дарга бөгөөд Улаанбаатар хотын захирагч Э.Бат-Үүл, Google компанийн Ази Номхон далай, Ойрхи дорнод, Африк, Орос дахь Засгийн газрын асуудал хариуцсан олон нийтийн бодлогын Ерөнхий захирал Сузан Пойнтер нар болон албаны бусад төлөөлөгчид оролцов. Дашрамд дурдхад Google translate-д монгол хэлийг нэвтрүүлэх ажлыг 2012 онд Улсын Их Хурлын дарга санаачилсан билээ.