Хонконгийн үл хөдлөх хөрөнгийн зах зээлд олон улсын анхаарлыг татсан томоохон худалдан авалт хийгдсэн тухай мэдээлэл 2026 оны хоёрдугаар сарын 19-ний өдөр цацагджээ.

Уг худалдан авалтыг "МАК" группийн Ерөнхийлөгч Н.Цэлмүүн гүйцэтгэсэн болох нь батлагдсан бөгөөд Монголын хамгийн том уул уурхайн бизнес эрхлэгч гэр бүл Хонконгийн Өмнөд дүүргийн тансаг бүсэд байрлах "One Stanley" цогцолборын салангид байшинг 247 сая хонконг доллар (31.5 сая ам.доллар)-аар худалдан авсан байна.

"One Stanley" цогцолбор нь Хонконгийн хамгийн тансаг бүсийн нэг болох Stanley-т байрладаг, далайн харагдацтай, нууцлал өндөр, VIP худалдан авагчдад чиглэсэн элит хотхон гэнэ.

Харин худалдан авагч тал болох Н.Цэлмүүн "South China Morning Post" сонинд өгсөн албан ёсны тайлбартаа уг үл хөдлөх хөрөнгийг бизнесийн зорилгоор бус, гэр бүлийн хэрэгцээнд зориулан авсан гэдгээ тодотгожээ. 

Б.Нямтайширын гэр бүл нь уул уурхай, барилгын материалын үйлдвэрлэлийн салбарт  "МАК" группийг 1993 онд үүсгэн байгуулсан бөгөөд тэд нүүрс, алт, зэс зэрэг ашигт малтмалын экспортын чиглэлээр үйл ажиллагаа явуулдаг.