Монгол Улсын Ерөнхийлөгчийн ивээл дор зохион байгуулж буй “Дэлхийн бизнес эрхлэгч эмэгтэйчүүдийн чуулга уулзалт”  Улаанбаатар хотноо болж байна.

“Урам зориг өгөх-нөлөөлөл үзүүлэх, хөрөнгө оруулах” (Inspire-Impact-Invest) гэсэн уриатай чуулга уулзалтад 25 орны 230 гаруй зочин төлөөлөгч оролцож байна.

Эмэгтэйчүүдийн эдийн засгийн оролцоог нэмэгдүүлэх нь зөвхөн бизнесийн хөгжил бус, улс орны тогтвортой хөгжил, ирээдүйн баталгаа гэж үздэг.

Энэ удаагийн чуулга уулзалт нь:

Хамтын ажиллагааны шинэ гүүр,
Мэдлэг, туршлага солилцох талбар,
Хөрөнгө оруулалтын шинэ боломж,
Хүйсийн тэгш байдлыг бодитоор дэмжих алхам юм.

Ерөнхийлөгч У.Хүрэлсүх чуулга уулзалтыг нээж үг хэллээ.

Тэрбээр, дэлхий нийтээрээ улс төр, нийгэм, эдийн засгийн олон сорилт, бэрхшээлтэй энэ үед ажлын байраа хадгалан, улс орныхоо төдийгүй дэлхийн эдийн засгийн хөгжилд хувь нэмрээ оруулж байгаа бизнес эрхлэгч, баялаг бүтээгч, хөрөнгө оруулагч эмэгтэйчүүдэд талархал илэрхийллээ.

Бизнес эрхлэгч эмэгтэйчүүд бичил, жижиг, дунд үйлдвэрлэл, инновац, ногоон эдийн засаг, орон нутгийн хөгжил зэрэг олон салбарт манлайлж, нийгмийн хариуцлагаа ухамсарлан, Тогтвортой хөгжлийн зорилтуудыг хэрэгжүүлэхэд үлгэр дуурайл болж байгааг тэмдэглэв.

Цаашид эмэгтэйчүүд бизнес эрхлэх тэгш боломжийг бүрдүүлэх, санхүүгийн эх үүсвэрээс тэгш хүртдэг байх, инновац, цахим шилжилт, ногоон эдийн засгийн хөгжилд эмэгтэйчүүдийн манлайлал, оролцоог дэмжих бодит алхмуудыг улс орнууд цаг алдалгүй хийх шаардлагатайг онцоллоо.

Энэ чуулга уулзалт нь бизнес эрхлэгч эмэгтэйчүүдийн түншлэл, нөхөрлөл, ажил хэргийн холбоог улам бэхжүүлж, илүү тэгш, илүү хүртээмжтэй, илүү энэрэнгүй ирээдүйг цогцлооход хувь нэмрээ оруулна гэдэгт итгэлтэй байгаагаа илэрхийллээ.

Мөн  Монгол Улс цаг ямагт түншлэл, хамтын ажиллагаа, эв нэгдлийн бат бөх гүүр байх болно гэдгийг хэлж, ирээдүйн бизнес эрхлэгч эмэгтэйчүүдийг бэлтгэж, хөгжин дэвших тэгш боломж бий болгохын төлөө дэлхий нийтээрээ хамтдаа зүтгэхийг уриаллаа.

Чуулга уулзалтын үеэр шийдвэр гаргах түвшний эмэгтэйчүүдийн төлөөлөл болох Д.Оюунхорол ногоон эдийн засаг, технологийн шинэчлэлийг ашиглах боломжуудын талаар тэрээр, "Олон улсын эмэгтэйчүүд энэ өдөр бизнест нөлөөлөх ногоон эдийн засгийн таатай санхүүгий орчинг хэрхэн яаж бүрдүүлж болох талаар саналаа солилцож байна шийдвэр гаргагчид  сонсож, тэдэнтэй хэрхэн хамтран ажиллах талаар ярилцаж шийдэлд хүрэх нь зайлшгүй чухал гэдгийг энэ хурал онцолж байна.

Монгол зэрэг олон оронд агаарын бохирдол болон орлогын тэгш бус байдал эмэгтэйчүүдэд илүү хүндээр тусдаг. Эмэгтэйчүүд өндөр эрүүл мэндийн зардал төлөх, албан ёсны хөдөлмөр эрхлэхэд саадтай тулгарах, санхүүгийн шийдвэр гаргалтаас гадуур үлдэх тохиолдол элбэг.

Харин эмэгтэйчүүдийг ногоон санхүү, технологид бүрэн оролцуулах боломжийг нээх нь зөвхөн тэгш байдлыг хангахаас гадна үржүүлэгч эдийн засгийн  нөлөө бий болгодог айл өрхийг бат бөх болгож, нийгмийг илүү тэсвэртэй болгож, эдийн засгийн өсөлтийг илүү хүртээмжтэй, хурдтай болгоно.

Эмэгтэйчүүд улс орон бүхэндээ манлайлагч байж маргаашийн , ирээдүйн эдийн засгийн өсөлтөнд нөлөөлөх байгаль эх дэлхийгээ хамгаалах  ур чадвар, боломж, ойлголтоор хангахад шийдвэр гаргагчид  зайлшгүй туслах боломж олгохыг хүсье. 

Дэлхийн хөдөлмөрийн зах зээлийн хувьсан өөрчлөгдөж буй энэ цаг үед эмэгтэй  бизнес эрхлэгчидэд ногоон эдийн засаг, технологийн шинэчлэлийг ашиглах боломжуудын талаар голчлон ярилцаж дэмжин хамтран ажиллах байх гэж найдаж байна." гэдгийг онцлов.